Forbes Life томошабинлар ва танқидчиларнинг меҳрини қозонишга улгурган энг сара анимелар ҳақида маълумот беради.
“Пўлат алкимёгар: Биродарлик”, 2009-2010
- 12+
- IMDb рейтинги: 9.1
- “Кинопоиск” рейтинги: 8.6
Хирому Аракаванинг шу номдаги мангасига асосланган “Пўлат алкимёгар: Биродарлик” фалсафий тошни излаш ҳақидаги ҳикоянинг иккинчи экранлаштириши бўлди. Сюжет марказида алкимёнинг асосий қоидасини – ўликларни тирилтирмасликни бузган ака-укалар туради. Бунинг оқибатида улар оғир жазо олади: Эдвард қўл ва оёғидан айрилади, укаси Алфонс эса бутун танасини йўқотиб, руҳи рицарлик совутида яшашга мажбур бўлади. Ака-укалар вазиятни тузатиш умидида фалсафий тошни излашга киришади.
“Ван-Пис”, 1999 йилдан бери
- 18+
- IMDb рейтинги: 9
- “Кинопоиск” рейтинги: 8.4
“Ван-Пис”ни анимелар орасида энг узоқ давом этаётган сериаллардан бири деб ҳисоблаш мумкин, чунки у 1 136 қисм ва 15 та тўлиқ метражли фильмни ўз ичига олади. Toei Animation студияси уни 1999 йилда ишлаб чиқаришни бошлаган ва бугунги кунда ҳам ҳикоя давом этмоқда. Аниме хазина қидираётган Сомон шляпали қароқчилар жамоасининг саргузаштлари ҳақида ҳикоя қилади. Қаҳрамонларнинг ҳар бири ўзига хос кучга эга ва уларни қимматбаҳо хазинани излашда кўплаб саргузаштлар кутмоқда.
2015 ва 2024 йилларда манга Гиннеснинг рекордлар китобига киритилган. Биринчи марта битта муаллифнинг энг кўп нусхада чоп этилган ягона комикслар туркуми сифатида, иккинчисида эса диск нашрларининг сони туфайли. “Ван-Пис” энг машҳур аниме сериалларидан бири бўлиб қолмоқда, шунинг учун 2023 йилда Netflix “One piece: Катта ўлжа” номли сериал адаптациясини чиқаргани ажабланарли эмас.
“Блич: Минг йиллик қонли жанг”, 2022 йилдан бошлаб
- 18+
- IMDb рейтинги: 9
- “Кинопоиск” рейтинги: 8.6
Studio Pierott томонидан яратилган “Блич” анимесининг якуни, унинг сўнгги 366-қисми 2012 йилда эфирга узатилган эди. Руҳларни кўра оладиган ўсмир Ичиго Куросаки ҳақидаги ҳикоянинг давоми. Бу қисмда Ичигонинг она шаҳрида одамлар ғойиб бўла бошлайди ва ёвуз кучлар Руҳлар жамияти устидан назоратни қўлга киритишга уринади.
2026 йилда аниме сериалининг сўнгги мавсуми чиқиши кутилмоқда, бироқ аниқ сана ҳали маълум эмас.
“Аждаҳо марвариди”, 1989-1996
- 12+
- IMDb рейтинги: 8.8
- “Кинопоиск” рейтинги: 8.2
“Аждаҳо марвариди” — Акира Торияма яратган асл манганинг 519 бобидан 325 тасини экранлаштирган “Аждаҳо марвариди”нинг давоми бўлиб, Ерни ёвузлар, бегона сайёраликлар ва бошқа мавжудотлардан ҳимоя қилиш ҳақидаги саргузашт анимесидир. Сюжет марказида Гокунинг тўйидан беш йил ўтгач содир бўлган воқеалар туради.
Жангчи Радиц Ерга келиб, қаҳрамондан сайёраларни забт этишни давом эттириш учун унга қўшилишни сўрайди. Бироқ Гоку рад этгач, Радиц унинг ўғлини ўғирлаб, агар қаҳрамон бир кеча-кундуз ичида 100 кишини ўлдирмаса, болани йўқ қилиш билан таҳдид солади. Энди Гоку ўз оиласи учун курашишга мажбур бўлади.
“Штейн дарвозаси”, 2011-2015
- 12+
- IMDb рейтинги: 8.8
- “Кинопоиск” рейтинги: 8.4
White Fox студияси томонидан яратилган визуал новелланинг аниме мосламаси. Сюжетга кўра, олим Окабе Ринтаро дўстлари билан келажак қурилмаларини ихтиро қилади. Вақт саёҳати ҳақидаги илмий анжуманда иштирок этгач, қаҳрамон ғалати воқеалар силсиласига дуч келади. У учрашган қиз вафот этади ва кутилмаганда қайта тирилади. Бу Окабе Ринтарони вақт бўйлаб саёҳат қилиш имконияти ҳақида ўйлаб кўришга ундайди.
Ўтмишдаги ҳодисаларнинг оқибатлари мавзусини кўтарадиган ва “Келажакка қайтиб” ёки “Капалак эффекти” фильмларини эслатувчи илмий-фантастик аниме. Дастлабки бир-икки қисм зерикарли туюлиши мумкин, аммо кейин сериал шиддат билан ривожланиб, воқеалар кетма-кетлигини кузатиб бориш қийинлашади.
“Наруто: Бўронли солномалар”, 2007-2017
- 12+
- IMDb рейтинги: 8.7
- “Кинопоиск” рейтинги: 8.3
“Ван-Пис” ёки “Покемонлар” каби бу сериални энг узоқ давом этган анимелардан бири дейиш мумкин. Агар икки мавсумнинг барча қисмларини бирлаштирса, 720 та серия бўлади, “Боруто” билан бирга эса уларнинг сони 1000 дан ошиб кетади.
Ҳеч ким ишонмаган бола ҳақидаги бу ҳикоя томошабинлар қалбини забт этди, чунки кўплаб мухлислар Наруто билан бирга улғайишди. “Наруто: Бўронли солномалар” қаҳрамоннинг ўсмирлик даври ҳақида ҳикоя қилади. Бу даврда хавф-хатарлар ва душманлар кучлироқ ҳамда айёр бўлиб, муаммолар кўпайиб боради. Баъзида эса Ойга учиб, бутун сайёрани қутқаришга тўғри келади. Бу вояга етиш ва ўзини енгиш, энг муҳими эса, ҳеч қачон таслим бўлмаслик ҳақидаги таъсирли ҳикоядир.
Изоҳ (0)