Мексика орқали ноқонуний йўллар билан АҚШга борган Ўзбекистон фуқаролари ватанга қайтарилди. Бу ҳақда UzReport телеканали орқали эфирга узатилган лавҳада маълум қилинди.
Маълумотларга кўра, 2021 йилнинг октябридан 2023 йилнинг октябрига қадар АҚШда чегарани ноқонуний кесиб ўтишга уринган 13 мингдан ортиқ Ўзбекистон фуқароси қўлга олинган.
Ўзбекистонга қайтарилган фуқаролардан бирининг айтишича, Никарагуадан Мексика орқали АҚШ чегарасидан ўтказиш учун 5 минг доллар тўлаш керак. Бундан ташқари, у шериклари билан йўлда хориж давлатларининг маҳаллий ҳуқуқ-тартибот идоралари ходимлари тўхтатганида 1,5—2 минг доллар берган.
Яна бир ватандошга кўра, у тўрт ой давомида АҚШ қамоқхонасида сақланган.
Сентябрь бошида АҚШ президенти Жо Байден маъмурияти Ўзбекистондан АҚШга одамларни ноқонуний олиб киришга уринган жиноий тармоқни аниқлашга ва фаолиятини тўхтатишга муваффақ бўлгани маълум қилинган эди. 11 сентябрь куни Самарқандда 14 минг доллар эвазига Самарқанд—Истанбул—Мадрид—Никарагуа йўналиши билан АҚШга ишга жўнатишни ваъда қилган шахс қўлга олинганди.
Ноябрь охирларида АҚШ Ички хавфсизлик департаменти АҚШ—Мексика чегараси орқали Америкага киришга уринаётган фуқароларини чиқариб юбориш сиёсати бўйича ўзгартиришларни эълон қилганди.
Изоҳ (0)