Davlat xavfsizlik xizmati AQSHga aldov yo‘li bilan yubormoqchi bo‘lgan yana yetti kishini ushladi.
DXXning Toshkent shahar bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamenti bilan hamkorlikda Chilonzor tumanida o‘tkazilgan tezkor tadbirda shunday holatlardan biri aniqlangan.
Toshkent shahrida yashovchi, 1979, 1999 va 2001-yillarda tug‘ilgan uch nafar shaxs o‘zaro til biriktirib, olti nafar fuqaroga viza hujjatlarini olib berish hamda Yevropa orqali AQSHda ishlash uchun yuborish evaziga 32 ming dollar olgan vaqtida ushlangan.
Tergovga qadar tekshiruv davomida yuqoridagi shaxslardan biri ushbu maqsadda muqaddam 3900 dollar olgani ham aniqlangan.
Buxoro shahrida kuzatilgan holatda esa 1997-yilda tug‘ilgan, muqaddam uch marotaba sudlangan shaxs aldov yo‘li 32 yoshli hamshaharining ishonchiga kirib, unga AQSH elchixonasidan tegishli viza olib, okean ortiga ishga yuborish evaziga 40 ming dollar talab qilgan. Ammo, u so‘ralgan puldan 30 ming dollarni oldindan olgan vaqtida ushlangan.
DXXning Samarqand viloyati bo‘yicha boshqarmasi xodimlari tomonidan ham viloyat IIB hamda IJQKD bilan hamkorlikda tezkor tadbirlar o‘tkazilgan. Jumladan, Samarqand viloyatida yashovchi, 1989 va 1995- yillarda tug‘ilgan ikki nafar shaxs o‘zaro kelishgan holda, Samarqand tumanida istiqomat qiluvchi fuqaroni O‘zbekiston—Turkiya—Portugaliya—Gvatemala-Meksika—AQSH yo‘nalishi orqali Qo‘shma Shtatlarga ishga yuborish evaziga 23 ming dollar talab qilib, oldindan 10 ming dollar olgan vaqtida ushlangan.
Boshqa holatda esa Samarqand shahrida yashovchi, 1983-yilda tug‘ilgan shaxs Samarqand tumanida istiqomat qiluvchi fuqaroni O‘zbekiston—Turkiya—Ispaniya—Gonduras—Meksika—AQSH yo‘nalishi orqali Qo‘shma Shtatlarga ishga yuborish evaziga 18 ming dollar talab qilib, oldindan 10 ming AQSH dollari olgan vaqtida ushlandi.
Hozirda barcha holatlar yuzasidan mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Izoh (0)