Америка Қўшма Штатларининг Ўзбекистондаги элчихонаси ўзбекистонликларни Қўшма Штатларга қонуний йўл билан боришга чақирди.
Қайд этилишича, 3 март куни Қўшма Штатлар Ўзбекистонга навбатдаги репатриация рейсини амалга ошириб, АҚШда қолишга қонуний рухсати бўлмаган Ўзбекистон фуқароларининг катта қисмини қайтарган. Бу парвоз Ўзбекистон фуқароларининг АҚШ—Мексика чегарасини ноқонуний кесиб ўтишига қарши АҚШ ҳукумати томонидан амалга оширилган чора-тадбирларнинг сўнггиси ҳисобланади.
“Қўшма Штатларга ноқонуний миграция хавфли ва серхаражат уринишдир. Биз Ўзбекистон фуқароларини одамларни товар сифатида кўрадиган жиноий гуруҳлар ёлғон ваъдаларига ишониб, жабрдийда бўлишликдан огоҳлантирамиз. Америка Қўшма Штатларига саёҳат қилишни хоҳловчиларни хавфсиз ва қонуний йўллар орқали сафар қилишга чақирамиз”, — дейилади хабарда.
АҚШ ҳукумати Қўшма Штатларда қолиш учун қонуний асосга эга бўлмаган Ўзбекистон фуқароларини мамлакатдан чиқариб юбориш бўйича Ўзбекистон ҳукумати билан яқин ҳамкорликни давом эттирмоқда. Қўшма Штатлар ўз ҳамкорлари билан хавфсиз, тартибли ва инсонпарвар миграция жараёнларини татбиқ этган ҳолда, Қўшма Штатларда қолиш учун қонуний асосга эга бўлмаганларни депортация қилиш ишларини давом эттиради.
2023 йилнинг 20 декабрида АҚШга ноқонуний йўллар билан кетган 119 нафар ўзбекистонлик ватанга қайтарилган эди. Шу йилнинг февраль охирларида эса АҚШга Сан-Диэго орқали 2500 дан ортиқ ўзбекистонлик ноқонуний киргани тўғрисида хабар берилганди.
Изоҳ (0)