АҚШ президенти Жо Байден Мексика билан чегарани ноқонуний кесиб ўтган муҳожирларга сиёсий бошпана беришни вақтинча тақиқловчи фармонни имзолади. Бу ҳақда Оқ уй матбуот хизмати хабар берди.
Хабарга кўра, чекловлар 5 июндан кучга киради, бироқ АҚШ-Мексика чегарасида бир ҳафта ичида ноқонуний қочқинларнинг кунлик ҳибсга олиниши сони 2500 нафардан ошсагина чекловлар қўлланилади.
Шу билан бирга, агар кунлик ҳибсга олишлар сони 1500 га тушса, АҚШнинг жанубий чегараси қайта очилиши мумкин. Оқ уйнинг таъкидлашича, бу чоралар АҚШда қолиш учун қонуний асосга эга бўлмаган шахсларни чиқариб юбориш жараёнини осонлаштириш учун мўлжалланган.
Янги чекловлар “Божхона ва чегара қўриқлаш” мобил иловасидан фойдаланган ҳолда чегарани кесиб ўтган шахсларга, шунингдек, тиббий фавқулодда вазиятларда одам савдоси қурбонлари ва кузатувсиз болаларга нисбатан қўлланилмайди.
АҚШда ноқонуний муҳожирлар сонининг ортиб бораётгани 2024 йил ноябрида бўлиб ўтадиган президентлик сайловларида собиқ президент Дональд Трамп ва Оқ уйнинг амалдаги раҳбари ўртасидаги қарама-қаршиликнинг асосий нуқталаридан бири ҳисобланади. Трамп Байденни “очиқ чегара сиёсати” учун танқид қилган ва агар давлат раҳбари этиб сайланса, Америка тарихидаги энг йирик ички депортация операциясини бошлашга ваъда берган.
Байден президентлиги даврида Мексика билан чегарадан ноқонуний равишда мамлакатга кирган муҳожирлар сони рекорд даражага етган. 2023 йилда АҚШ жанубий чегарасини 2,4 миллиондан ортиқ одам кесиб ўтган.
Хусусан, 2021 йилдан 2023 йилгача Ўзбекистоннинг 13 600 нафар фуқароси Мексика орқали АҚШга ноқонуний киришга уринган. АҚШга ноқонуний миграция бўйича Туркия етакчилик қилмоқда — 30 800 нафар Туркия фуқароси АҚШ чегарасини кесиб ўтмоқчи бўлган. Ундан кейинги ўринни 15,5 минг киши билан Мавритания эгаллаган бўлса, Ўзбекистон бу рўйхатда учинчи ўринда турибди.
Изоҳ (0)