Сирдарё вилояти ва Тошкент шаҳрида хорижга ишга юбориш ҳамда виза ҳужжатларини расмийлаштириб беришни ваъда қилган шахслар ушланди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Гулистон туман бўлими томонидан ДХХ ходимлари билан ҳамкорликда тезкор тадбир ўтказилган. Тадбирда С.С. исмли шахс фуқаро Ж.Р.ни танишлари ёрдамида 2,3 минг доллари эвазига Польша орқали АҚШга ишлаш учун юборишини ваъда қилиб, олдиндан виза ҳужжатларини расмийлаштириш эвазига 900 доллар ва 1,2 миллион сўмни олган вақтида ашёвий далиллар билан ушланган.
Шу каби, департаментнинг Миробод туман бўлими томонидан ДХХ ходимлари билан ҳамкорликда ўтказилган тезкор тадбирда Ж.Т. исмли шахс фуқаро Х.З.ни танишлари ёрдамида АҚШга юбориш учун виза ҳужжатларини расмийлаштириб бериши эвазига 2 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
11-сентябр куни Самарқандда 14 минг доллар эвазига Самарқанд—Истанбул—Мадрид—Никарагуа йўналиши билан АҚШга ишга жўнатишни ваъда қилган шахс қўлга олингани хабар қилинганди. Июнь ойининг ўрталарида Самарқандда икки кишини АҚШга юбориш учун 40 минг доллар олган шахс ушланганди. Май ойида эса шундай ноқонуний йўллар билан АҚШга юбориш учун 30 минг доллар олган шахс қўлга олинганди.
Изоҳ (0)