Самарқанд вилоятида фуқароларни ноқонуний йўллар билан АҚШга юбориш билан шуғулланиб келган шахс қўлга олинди. Бу ҳақда вилоят ИИБ ахборот хизмати хабар берди.
Қайд этилишича, 22 ёшли фуқаро ИИБга ариза билан мурожаат қилиб, Самарқанд шаҳрида яшовчи шахс фирибгарлик йўли билан ноқонуний тарзда АҚШга жўнатиш ишлари билан шуғулланиб келаётганини маълум қилган. У аввалига Европа давлатлари орқали Мексикага, у ердан эса АҚШ ҳудудига олиб ўтиш учун 30 минг АҚШ доллари, ҳужжатларни расмийлаштириш учун эса олдиндан 10 минг АҚШ доллари талаб қилган.
Самарқанд вилоят ИИБ Тезкор-қидирув хизмати Жиноят-қидирув бошқармаси Уюшган жиноятчиликка қарши курашиш бўлими ходимлари томонидан Самарқанд шаҳар Али Қушчи кўчасида тезкор тадбир ўтказилган. Тадбир давомида ушбу шахс аризачидан 10 минг доллар олаётган вақтида ашёвий далиллар билан ушланган.
Ҳолат юзасидан гумонланувчига нисбатан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари олиб борилмоқда.
АҚШга юбориш ҳолатлари
Март бошларида Самарқанд шаҳрида 64 нафар фуқарони АҚШга юборишини айтиб, уларнинг 4 миллиард сўмини ўзлаштирганларга суд ҳукми ўқилганди. Шунингдек, Самарқандда Мексика орқали АҚШга юборишини айтиб, фуқародан 50 минг доллар сўраган шахс ушлангани, Самарқандда фуқарони 30 минг долларга АҚШга юбормоқчи бўлган ҳайдовчи қўлга олингани, Навоийда фуқарони АҚШга ишга юборишини айтиб, 800 доллар олган шахс ушлангани тўғрисида хабар берилганди.
Изоҳ (0)