АҚШда ўтган икки йил ичида чегарани ноқонуний кесиб ўтишга уринган 13 мингдан ортиқ Ўзбекистон фуқароси қўлга олинган. Бу ҳақда АҚШ божхона ва чегарани ҳимоя қилиш хизматининг ички маълумотларига таяниб, Fox News хабар берди.
Қайд этилишича, 2021 йилнинг октябридан 2023 йилнинг октябрига қадар АҚШга Мексика орқали, ўн минглаб фуқаролар ноқонуний киришга ҳаракат қилган бўлиб, мамлакат ҳукумати уларни “алоҳида қизиқиш уйғотувчи шахслар” тоифасига киритган. АҚШ ҳукуматининг фикрича, ушбу шахслар терроризм билан алоқадор ёки алоқаси бўлиши эҳтимоли бор йўналишлар орқали мамлакатга кириб келгани сабабли АҚШ хавфсизлигига таҳдид сифатида кўрилади.
Икки йил ичида АҚШ чегарасини ноқонуний кесиб ўтмоқчи бўлган шахсларнинг энг кўп қисми Туркия фуқароларидир — 30 830 киши. Шунингдек, қуйидаги давлатлар фуқаролари ҳам бу борадаги етакчи ўринларда:
- 15 594 нафар Мавритания фуқаролари;
- 13 624 нафар Ўзбекистон фуқаролари;
- 6386 нафар Афғонистон фуқаролари;
- 3153 нафар Миср фуқаролари;
- 1613 нафар Покистон фуқаролари.
Ушбу рақамларга мамлакат ҳудудига киришга муваффақ бўлган ва портлардан ўтиб кетганлар киритилмаган. Манбаларга кўра, Байден бошқаруви даврида АҚШга 1,5 миллиондан ортиқ “қочқин” киришга муваффақ бўлган.
11 сентябрь куни Самарқандда 14 минг доллар эвазига Самарқанд—Истанбул—Мадрид—Никарагуа йўналиши билан АҚШга ишга жўнатишни ваъда қилган шахс қўлга олингани хабар қилинганди. Июнь ойининг ўрталарида Самарқандда икки кишини АҚШга юбориш учун 40 минг доллар олган шахс ушланганди. Май ойида эса шундай ноқонуний йўллар билан АҚШга юбориш учун 30 минг доллар олган шахс қўлга олинганди.
Изоҳ (0)