Тошкентда пул эвазига фуқароларни АҚШ ва Польшага юбормоқчи бўлган шахсларга жиноят иши қўзғатилди.
Бош прокуратура ҳузуридаги департаментининг Чилонзор туман бўлими ва ДХХ ходимлари ҳамкорлигида ўтказилган тезкор тадбирда фуқаро И.А. фуқаро Ш.Ш.нинг ишончига кириб, уни танишлари ёрдамида Туркия орқали айланма йўллар билан АҚШга юбориши эвазига 334 миллион сўм олган вақтида ашёвий далиллар билан ушланган.
Шу каби, департаментнинг Сергели туман бўлими ва ДХХ ходимлари ҳамкорлигида ўтказилган тезкор тадбирда фуқаро В.Г. фуқаро А.Ю.ни танишлари ёрдамида Польшага ишга юбориши эвазига 550 долларни олган вақтда ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
АҚШга ноқонуний бориш
АҚШ—Мексика чегараси орқали Америкага киришга уринаётган Ўзбекистон фуқароларига 2023 йилнинг ноябрида огоҳлантириш эълон қилиниб, унда ноқонуний кираётган фуқаролар АҚШга қўйиб юборилмаслиги, иммиграция иши ҳал қилингунга қадар ҳибсда сақланиши маълум қилинганди.
Ўша йилнинг декабрида АҚШга ноқонуний йўллар билан кетган 119 нафар ўзбекистонлик ватанга қайтарилган эди. 2024 йил март ойида эса яна 74 нафар ўзбекистонлик олиб келинди.
АҚШнинг Ўзбекистондаги элчихонаси ноқонуний миграция хавфли ва серхаражат уриниш эканини билдириб, Ўзбекистон фуқароларини одамларни товар сифатида кўрадиган жиноий гуруҳлар ёлғон ваъдаларига ишониб, жабрдийда бўлишдан огоҳлантирди.
2021 йилдан 2023 йилгача Ўзбекистоннинг 13 600 нафар фуқароси Мексика орқали АҚШга ноқонуний киришга уринган.
Изоҳ (0)