АҚШга юбориш учун 14 минг доллар талаб қилган Инвестициялар, саноат ва савдо вазирлиги ходими ушланди (видео)

Самарқанд, Жиззах ва Сирдарё вилоятларида фуқароларни АҚШга юбориш билан боғлиқ ноқонуний ҳолатлар аниқланди.

Инвестициялар, саноат ва савдо вазирлиги ходими хизмат мавқеидан фойдаланган ҳолда, Самарқанд шаҳрида яшовчи фуқаронинг ишончига кириб, унга гўёки АҚШ элчихонасидаги танишлари орқали виза расмийлаштириб, Америкага юбориш эвазига 14 минг доллар талаб қилган.

ДХХнинг Самарқанд вилояти бўйича бошқармаси ходимлари томонидан ички ишлар органлари билан ҳамкорликда ўтказилган тезкор тадбирда, у олдиндан 10 минг долларни олган вақтида ушланган.

1999 йилда Оқдарё туманида туғилган, ҳозирда АҚШда яшовчи, муқаддам судланган шахс Самарқанд иқтисодиёт ва сервис институтида ўқийдиган қариндоши билан ўзаро тил бириктириб, маҳаллий фуқарони Мексика орқали АҚШга ишга юбориш эвазига ундан 16 минг доллар талаб қилган. Аммо Иқтисодиёт ва сервис институти талабаси сўралган пулдан 10 минг долларни олган вақтида ушланган.

Қайд этилишича, ҳозирда АҚШда яшаётган оқдарёлик шахс муқаддам тўрт нафар фуқарони Америкага ишга юборишни ваъда қилиб, улардан 41 600 доллар олган ва ўз эҳтиёжлари учун ишлатиб юборган.

ДХХ Жиззах вилояти бўйича бошқармаси ходимлари томонидан ИЖҚКД ва ички ишлар органлари билан ҳамкорликда Жиззах шаҳрида ўтказилган тезкор тадбирда Андижон вилоятида яшовчи, 1999 йилда туғилган шахс Фориш туманида истиқомат қилувчи фуқарони алдаб, танишлари ёрдамида уни Туркия—Европа—Никарагуа—Мексика орқали АҚШга юбориш эвазига талаб қилинган 17 минг доллардан 10 минг долларни олган вақтида қўлга тушган.

1991 йилда Сирдарё вилоятида туғилган, ҳозирда АҚШнинг Оҳаё штатида яшовчи фуқаро ва Янгиер шаҳрида истиқомат қилувчи, 1991 йилда туғилган шахс ўзаро тил бириктириб, Ховос туманида яшовчи фуқарони Мексика орқали АҚШга юбориш, шунингдек, бунинг учун зарур бўладиган виза ва бошқа ҳужжатларни расмийлаштириб бериш эвазига ундан 8200 доллар талаб қилган.

У 8100 доллар ва 1 миллион 240 минг сўм олган вақтида ДХХ ҳамда Бош прокуратура ҳузуридаги департамент ходимлари томонидан ушланган.

Ҳозирда мазкур шахсларга нисбатан жиноят ишлари қўзғатилган.