Давлат хавфсизлик хизмати ходимлари томонидан ноқонуний миграцияга қарши кураш йўналишида ички ишлар идоралари билан ҳамкорликда тезкор тадбирлар ўтказилди.
Жумладан, ДХХ Самарқанд вилояти бўйича бошқармаси ходимлари томонидан ўтказилган тезкор тадбирда Самарқанд шаҳрида яшовчи 44 ёшли шахс маҳаллий фуқаронинг ишончига кириб, уни Мексика давлати орқали АҚШга юборишни ваъда қилиб, 25 минг доллар талаб қилгани аниқланган. Мазкур шахс ҳужжатларни расмийлаштириб бериш эвазига олдиндан 15 минг доллар олган вақтида ушланган.
Шунингдек, Пастдарғом туманида яшовчи 32 ёшли шахс Каттақўрғон туманида истиқомат қилувчи 27 ёшли таниши билан келишган ҳолда, маҳаллий фуқаронинг ишончига кириб, уни Туркия—Арманистон—Никарагуа—Мексика йўналиши орқали Қўшма Штатларга юборишни ваъда қилиб, эвазига 23 минг доллар талаб қилган. Аммо улар олдиндан 12 минг доллар олган вақтларида ушланган.
ДХХ Фарғона вилояти бўйича бошқармаси ходимлари томонидан вилоят ИИБ билан ҳамкорликда ўтказилган тезкор тадбирда эса Андижон туманида яшовчи 24 ёшли шахс Қўқон шаҳрида истиқомат қилувчи фуқарони Америкага юборишни ваъда қилиб, эвазига 10 минг доллар олган вақтида ушланган.
Ҳозирда мазкур ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
11 сентябрь куни Самарқандда 14 минг доллар эвазига Самарқанд—Истанбул—Мадрид—Никарагуа йўналиши билан АҚШга ишга жўнатишни ваъда қилган шахс қўлга олингани хабар қилинганди. Июнь ойининг ўрталарида Самарқандда икки кишини АҚШга юбориш учун 40 минг доллар олган шахс ушланганди. Май ойида эса шундай ноқонуний йўллар билан АҚШга юбориш учун 30 минг доллар олган шахс қўлга олинганди.
Изоҳ (0)