O‘zbekistonning to‘rt hududida AQSHga noqonuniy yo‘llar bilan yuborishni va’da qilgan bir necha shaxslar ushlandi.
Davlat xavfsizlik xizmatining Andijon viloyati bo‘yicha boshqarmasi xodimlari tomonidan IJQKD va ichki ishlar organlari bilan hamkorlikda o‘tkazilgan tezkor tadbirda, Marhamat tumanida yashovchi, 1997-yilda tug‘ilgan shaxs Asaka tumanida istiqomat qiluvchi fuqaroni Meksika davlati orqali AQSHga yuborish evaziga 19 ming dollar talab qilib, oldindan 15 ming dollar olgan vaqtida ushlangan.
Tezkor tadbir davom ettirilib, 15 ming dollardan 6 ming dollarni olgan vaqtida mazkur noqonuniy ishga aloqador bo‘lgan, Marhamat tumanida yashovchi, 1992-yilda tug‘ilgan fuqaro ham qo‘lga olingan.
DXX Navoiy viloyati bo‘yicha boshqarmasi va Bosh prokuratura huzuridagi departamentning hududiy boshqarmasi xodimlari hamkorligida o‘tkazilgan tezkor tadbirda, Samarqand viloyatining Pastdarg‘om tumanida yashovchi, 1997-yilda tug‘ilgan shaxs Nurota tumanida istiqomat qiluvchi fuqaroni Meksika orqali AQSHga yuborish evaziga 14 ming dollar olgan vaqtida ushlangan.
DXX Sirdaryo viloyati bo‘yicha boshqarmasi xodimlari tomonidan IJQKD bilan hamkorlikda o‘tkazilgan tezkor tadbirda, Jizzax shahrida yashovchi, 1998-yilda tug‘ilgan shaxs 15 ming dollar evaziga Sardoba tumanida istiqomat qiluvchi fuqaroni AQSHga yuborishni va’da qilib, oldindan 12 ming dollar va 6 million so‘m olgan vaqtida ushlangan.
Shuningdek, DXX Toshkent shahar bo‘yicha boshqarmasi xodimlari tomonidan Bosh prokuratura huzuridagi departament bilan hamkorlikda Bektemir tumanida o‘tkazilgan tezkor tadbirda, Toshkent viloyatining Angren shahrida yashovchi, 1990-yilda tug‘ilgan ayol Chilonzor tumanida istiqomat qiluvchi fuqaroga viza va boshqa tegishli hujjatlarni rasmiylashtirib, uni Turkiya—Nikaragua—Meksika yo‘nalishi orqali AQSHga yuborish evaziga 16 ming dollar talab qilib, oldindan 9 ming dollar olgan vaqtida ushlangan.
Hozirda mazkur shaxslarning barchasiga nisbatan jinoyat ishi qo‘zg‘atilib, tergov harakatlari olib borilmoqda.
AQSHga noqonuniy borish
AQSH—Meksika chegarasi orqali Amerikaga kirishga urinayotgan O‘zbekiston fuqarolariga 2023-yilning noyabrida ogohlantirish e’lon qilinib, unda noqonuniy kirayotgan fuqarolar AQSHga qo‘yib yuborilmasligi, immigratsiya ishi hal qilingunga qadar hibsda saqlanishi ma’lum qilingandi.
O‘sha yilning dekabrida AQSHga noqonuniy yo‘llar bilan ketgan 119 nafar o‘zbekistonlik vatanga qaytarilgan edi. 2024-yil mart oyida esa yana 74 nafar o‘zbekistonlik olib kelindi.
AQSHning O‘zbekistondagi elchixonasi noqonuniy migratsiya xavfli va serxarajat urinish ekanini bildirib, O‘zbekiston fuqarolarini odamlarni tovar sifatida ko‘radigan jinoiy guruhlar yolg‘on vaʼdalariga ishonib, jabrdiyda bo‘lishdan ogohlantirdi.
Izoh (0)