НАТОнинг собиқ бош котиби Йенс Столтенберг Украинадан вақтинчалик ҳудудий имтиёзлар Россия билан урушни тугатиш йўлидаги қадам бўлиши мумкинлигини қайд этди.
Унинг фикрича, бундай чора Киев бу ҳудудларни абадий тарк этишини англатмайди.
“Эвазига Украина хавфсизлик кафолатларини олиши муҳим. Бу НАТО аъзолиги ёки украиналикларни қуроллантириш ва қўллаб-қувватлаш бўйича бошқа чоралар бўлиши мумкин”, деди Столтенберг.
Столтенберг Зеленскийнинг ўт очишни тўхтатган тақдирда Россияга ҳеч қандай ҳудудни бермаслик талабини қўллаб-қувватлади, бироқ буни амалга ошириш қийинлигини таъкидлади.
Аввалроқ Зеленский агар Украина НАТОга қабул қилинса, Киев Россия билан урушнинг “қайноқ фазасини” тугатишга рози бўлган эди.
Унинг таъкидлашича, бой берилган ҳудудлардан воз кечиш ҳақида гап кетмаяпти. Зеленскийнинг сўзларига кўра, НАТО Украинани аннексия қилинган Қримни ўз ичига олган халқаро тан олинган чегаралари доирасида таклиф қилиши керак.
“Ишғол қилинган ҳудудларни кейинроқ, дипломатик йўл билан қайтариш мумкин. Агар биз урушнинг қизғин босқичини тўхтатмоқчи бўлсак, бизнинг назоратимиз остида бўлган Украина ҳудудини НАТО соябони остига олишимиз керак”, дейди у.
Унинг фикрича, буни тезда амалга ошириш керак. Альянсга аъзолик Россия президенти Владимир Путиннинг “қайтмаслигини” таъминлайди. Украина етакчисининг таъкидлашича, агар уруш НАТО хавфсизлик кафолатисиз шунчаки тўхтатиб қўйилса, у тез орада яна қайта бошланади.
Шу билан бирга, ФТ манбалари “ҳудудлар эвазига НАТО аъзолиги” ғоясини амалга оширишда қийинчиликлар мавжудлигини қайд этди. Бу қийинчиликлар ҳам Россиянинг Украинанинг альянсга аъзо бўлишига қатъиян қарши эканлиги, ҳам АҚШ ва блокнинг бошқа давлатлари бунга тайёрми-йўқми деган масалада аниқ тушунчанинг йўқлиги туфайли юзага келмоқда.
Июнь ойида Путин биринчи марта Киев билан тинчлик музокараларини бошлаш шартларини очиқлаган эди. Бу шартлар орасида НАТО ва бошқа ҳарбий иттифоқларга аъзо бўлишдан воз кечиш, шунингдек, Украина армиясини Луганск, Донецк, Запорожье ва Херсон вилоятларининг маъмурий чегараларидан олиб чиқиш ҳамда ушбу ҳудудлар устидан суверенитетни йўқотганлигини тан олиш мавжуд. Зеленский бу талабларни навбатдаги ультиматум деб баҳолаб, уларни муҳокама қилишни рад этган.
Изоҳ (0)