Украина президенти Владимир Зеленский армия ўз кучи билан Қрим ва Донбассни қайтариб ололмаслигини айтди. Бу ҳақда у Франциянинг Le Parisien газетасига берган интервьюсида маълум қилди.
Зеленскийдан урушни тугатиш учун қандай муросага боришга тайёрлиги сўралди. “Қрим ёки Донбассни, ҳеч бўлмаганда вақтинча беришга тайёрмисиз?” деб сўради журналист. Сиёсатчи қуйидагича жавоб берди:
Ҳудудларимизни бера олмаймиз. Украина конституцияси бизга бундай қилишни тақиқлайди. Ҳозирги кунда бу ҳудудлар де-факто россияликлар назорати остида. Уларни қайтариб олишга кучимиз етмайди. Биз фақатгина халқаро ҳамжамиятнинг дипломатик босимига умид қилишимиз мумкин, токи бу Путинни музокаралар столига ўтиришга мажбур қилсин, деди у.
Сиёсатчидан, шунингдек, Россия президенти Владимир Путин билан музокаралар столига ўтиришга тайёр ёки йўқлигини сўрашди.
Муҳими, қаршингизда ким ўтиргани эмас. Муҳими, музокаралар олиб бораётган пайтингизда қандай аҳволда эканлигингиз. Бизнинг позициямиз заиф деб ўйламайман, аммо кучли позицияда ҳам эмасмиз. НАТОга аъзо бўламизми? Билмаймиз. Европа Иттифоқига кирамизми? Ҳа, келажакда, лекин қачон?
Бундай шароитда Путин билан музокаралар столига ўтириш унга бизнинг минтақамиздаги барча масалаларни ҳал қилиш ҳуқуқини бериш билан баробар бўларди. Аввало, биз моделми, ҳаракат ёки тинчлик режасиними — қандай номлашни хоҳласангиз — шуни ишлаб чиқишимиз лозим. Шундагина биз уни Путинга ёки кенг маънода рус халқига тақдим эта оламиз, деди Украина президенти.
Зеленский ҳеч бир жаҳон етакчиси “Путин билан Украинасиз музокара олиб боришга ҳақли эмас”лигини таъкидлади.
Биз бу мандатни ҳеч кимга бермадик. Биз — қурбонлармиз, дея хулоса қилди у.
Украина шартлари
Украина қўшинларни 1991 йил чегараларига олиб чиқишни назарда тутувчи “тинчлик формуласи”ни амалга оширишни талаб қилмоқда. Гап 2014 ва 2022 йилларда Россия томонидан у ерда ўтказилган “референдумлар” ва Украинанинг Қрим, Донецк, Луганск, Херсон ва Запорожье вилоятлари ноқонуний аннексия қилингани ҳақида кетмоқда. Москва “тинчлик формуласи” асосида музокаралар олиб бориш имкониятини истисно қилади.
Россия шартлари
Путин ўт очишни тўхтатиш учун ўз шартларини илгари сурди, жумладан, Украина қўшинлари ўзини ўзи мустақил деб эълон қилинган ДХР, ЛХР, Херсон ва Запорожье вилоятларидан олиб чиқилиши, ушбу тўртта ҳудуд ва Қрим гўёки халқаро миқёсда Россиянинг бир қисми сифатида тан олиниши, Украинанинг НАТОга аъзоликдан воз кечиши ва санкцияларни олиб ташлаш. Зеленский бу таклифни “ишониб бўлмайдиган” ультиматум деб атади.
Изоҳ (0)