Россия мудофаа вазири Андрей Белоусовнинг Пхеньянга ташрифи чоғида Шимолий Корея етакчиси Ким Чен Ин уни Украинага қарши урушда сўзсиз қўллаб-қувватлашига ишонтирди.
Россиялик вазир билан 29 ноябрь куни бўлиб ўтган учрашувда у Россиянинг Украинага ракета зарбаларини “ўзини ҳимоя қилиш ҳаракати” деб атади.
Кимнинг талқинига кўра, қўшни давлатга ҳужум қилган рус қўшинлари “Россия суверенитети ва ҳудудий яхлитлигини гегемон империалистик амбициялардан ҳимоя қилиш” билан шуғулланмоқда.
КХДР етакчиси урушнинг боришида айбни Ғарбга юклади
Кимнинг таъкидлашича, Ғарб АҚШ бошчилигида Украинага босим ўтказган ва уни узоқ масофали қуроллари билан Россия ҳудудига ҳужум қилишга “мажбур қилган”. Унинг сўзларига кўра, Украинанинг Россияга қарши Ғарб ракеталари ёрдамида амалга ошираётган ҳужумлари Ғарбнинг можарода “тўғридан-тўғри ҳарбий иштироки” билан баробар.
Белоусов, ўз навбатида, Шимолий Кореянинг “мутлақо мустақил ташқи сиёсатини” олқишлади.
Россия мудофаа вазири Ким Чен Ин билан учрашув олдидан шимолий кореялик ҳамкасби Но Кван Чхол билан музокаралар ўтказди, улар ҳарбий ҳамкорликни янада фаоллаштириш масалаларини муҳокама қилдилар.
Ноябрь ойи ўрталарида АҚШ президенти Жо Байден маъмурияти Украинага Вашингтондан олинган узоқ масофали қуроллар билан Россия ҳудудига чуқур ҳужум қилишга рухсат берган эди.
КХДРдан Украинадаги урушга юборилган аскарлар
Жанубий Корея ва АҚШнинг ҳисоб-китобларига кўра, Шимолий Корея Россияга 10 мингдан ортиқ аскар юборган. Улардан баъзилари аллақачон Курск вилоятидаги жангларда қатнашган деб тахмин қилинмоқда. Украина президенти Владимир Зеленский урушга юборилган Шимолий Корея аскарлари сони 100 мингга етиши мумкинлиги ҳақида огоҳлантирган. Сеул маълумотларига кўра, КХДР Россияга оғир артиллерия – ўзиюрар гаубицалар ва кўплаб ракета тизимларини ҳам етказиб беради.
Россия ва Шимолий Корея Россиянинг Украинага ҳужуми бошланганидан кейин ҳарбий соҳадаги ҳамкорликни кучайтира бошлади. 2024 йил июнь ойида Россия президенти Владимир Путин Шимолий Кореяга ташриф буюриб, Ким Чен Ин билан ҳужум содир бўлган тақдирда бир-бирини қўллаб-қувватлашни назарда тутувчи, шунингдек, Ғарб санкцияларига қарши ҳамкорликни ўз ичига олган кенг қамровли стратегик шартнома имзолаган эди.
Изоҳ (0)