Украина президенти Владимир Зеленский Грузия раҳбариятига қарши санкциялар киритди. Бу ҳақда у ўзининг Telegram каналидаги видеомурожаатида маълум қилди.
Украина мухолифат намойишларини тарқатиб юборгани учун Грузия ҳукуматига қарши санкциялар киритди. Хусусан, мамлакат бош вазири Ираклий Кобахидзе ва раҳбариятнинг бошқа вакиллари, жумладан, ҳукмрон “Грузия орзуси” партияси етакчиси Бидзина Иванишвилига нисбатан чеклов чоралари қўлланилган.
“Бу Грузия ҳукуматининг мамлакатни Россия президенти Владимир Путинга топшираётган қисмига қарши санкциялар. Биз бу минтақада ҳеч кимни йўқота олмаймиз: на Грузия, на Молдова, на Украина. Биз ўзимизни Москвадан биргаликда ҳимоя қилишимиз керак”, деди Зеленский.
Украина президенти, шунингдек, Европа иттифоқи, АҚШ ва бутун дунёни бу масалада “принципиал” ҳаракат қилишга чақирди. Аввалроқ у Ғарбга нисбатан “Грузия орзуси” сиёсати туфайли мухолифат митингларини тарқатиб юборишни “шармандали ҳолат” деб атаган эди.
Грузия 2023 йил декабрида Европа иттифоқига аъзо бўлиш учун номзод мақомини олган. Бироқ республикада “хорижий агентлар тўғрисида”ги қонун қабул қилингандан сўнг, блокка қўшилиш жараёни тўхтатилди. АҚШ инсон ҳуқуқлари бузилганини тилга олиб, ўнлаб Грузия фуқароларига виза чекловлари жорий қилди. Ҳозирги норозилик намойишлари фонида Вашингтон қўшимча санкциялар тайёрланаётганини эълон қилди.
Грузиядаги ички сиёсий вазият октябрь охиридаги парламент сайловларидан кейин кескинлашди, унда “Грузия орзуси” яна ғалаба қозонди. Овоз бериш натижаларини мухолифат партиялари ва президент Саломе Зурабишвили тан олмади. Бир ой ўтгач, Кобахидзе Грузиянинг ЕИга кириши бўйича музокараларни 2028 йил охиригача музлатиб қўйиши ва Европа молиявий ёрдамидан воз кечишини маълум қилди.
Шу вақт ичида республикада хавфсизлик кучлари билан тўқнашувлар билан кечган норозилик намойишлари бўлиб ўтди.
Изоҳ (0)