Шимолий Корея Украинага қарши урушда иштирок этиш учун Россияга 100 минг нафаргача ҳарбий юбориши мумкин. Бу ҳақда манбаларга таяниб, Bloomberg хабар берди.
Манбаларга кўра, Шимолий Корея бундай қадамни қўйиши мажбурий эмас. Бундай миқёсдаги ҳарбий ёрдам бир вақтнинг ўзида 100 минг кишилик контингент юборилишини англатмайди, балки ротация ҳисобга олинган ҳолда Шимолий Корея кучларининг Россиядаги умумий сонини назарда тутади.
Украинанинг Жанубий Кореядаги элчиси Дмитрий Пономаренко ҳам шундай прогноз берган. У Курск вилоятига юборилган 15 минг нафар шимолий кореялик ҳарбий ойлик интервал билан алмашишини айтган. Элчи Шимолий Корея аскарлари Россия ҳарбийлари томонидан эгалланган Украина ҳудудига юборилишини ҳам истисно этмаган.
Россия ва Шимолий Корея ўртасидаги стратегик ҳамкорлик
Бир неча кун аввал Шимолий Корея ва Россия кенг қамровли стратегик шериклик тўғрисидаги шартномани ратификация қилди. Россия президенти Владимир Путиннинг Пхеньянга ташрифи чоғида имзоланган битим, агар томонлардан бири бирон-бир давлат томонидан қуролли ҳужумга учраса ва шу тариқа уруш ҳолатида қолса, бир давлат бошқа давлатга “ўз ихтиёридаги барча воситалар билан” ҳарбий ва бошқа ёрдам кўрсатишини назарда тутади.
Сўнгги ҳафталарда Украина, Жанубий Корея ва АҚШ разведкаси урушда иштирок этиш учун Шимолий Корея ҳарбийлари Россияга юборилгани ҳақида бир неча бор хабар берганди. Пхеньяннинг бундай хатти-ҳаракати БМТда хавотирга, НАТО ва Европа Иттифоқи томонидан танқидга сабаб бўлган.
Сеул, Вашингтон ва Киев маълумотларига кўра, КХДР кучларининг бир қисми қарши ҳужумда иштирок этиш учун Украина билан чегарадош Курск вилоятига юборилган. Шу билан бирга, Шимолий Корея ҳарбийлари аллақачон ушбу ҳудудда йўқотишлар олиб бормоқда, деди Украина президенти Владимир Зеленский. АҚШ президенти Жо Байден Украинага Россия ҳудудидаги нишонларга зарба бериш учун узоқ масофали ATACMS ракеталаридан фойдаланишга рухсат берди. Бу Россиянинг Шимолий Корея қўшинларини жангга юбориш ҳақидаги кутилмаган қарорига жавоб бўлди.
Изоҳ (0)