АҚШнинг сайланган президенти Дональд Трампнинг маслаҳатчилари Украинадаги урушни тўхтатиш бўйича таклифларни илгари сурмоқда. У Россияга ҳудудий ён босишни ҳам ўз ичига олади. Бу ҳақда Deutsche Welle хабар берди.
Трамп ҳали тинчлик режасини ишлаб чиқиш учун ишчи гуруҳини тўпламаган. Бунинг ўрнига, унинг жамоаси режа қандай бўлиши мумкинлиги ҳақида таклифларни тайёрламоқда. Асосий мақсад Москва ва Киевни музокаралар столига ўтиришга мажбур қилишдан иборат. Айни пайтда учта асосий таклиф мавжуд:
Украина ва Россия бўйича бўлажак махсус элчи Кит Келлогдан: У фронт чизиғи бўйича можарони музлатиб қўйишни илгари сурмоқда. АҚШ Украинага “кучли позициядан туриб музокаралар олиб бориш” имкониятини таъминлаши ва Кремлга ўт очишни тўхтатишга риоя қилмаслик оқибатлари ҳақида огоҳлантириши керак.
Келлогга кўра, Трамп фақат Украина музокараларга рози бўлган тақдирдагина, унга кўпроқ қурол-яроғ беради, агар Россия урушни тўхтатиш имкониятини муҳокама қилишдан бош торца, Вашингтон ”Украинани қуроллантириши” ҳақида уни огоҳлантиради. Украинанинг НАТОга аъзо бўлиши бўйича музокаралар эса кейинга қолдирилади.
АҚШ вице-президенти лавозимига Трамп томонидан номзоди кўрсатилган Жеймс Девид Венс мавжуд қарама-қаршилик чизиғи бўйлаб демилитаризация зонасини ташкил этишни таклиф қилмоқда. Бу ҳудуд келажакда Россиянинг эҳтимолий босқинчилигининг олдини олиш мақсадида “кучли мудофаа билан таъминланади”. Венснинг режасида Украинанинг НАТОга аъзо бўлиши кўзда тутилмаган.
Миллий разведканинг собиқ раҳбари Ричард Гренелл июль ойида Украина шарқида “автоном зоналар” ташкил этиш тарафдори бўлган, аммо бу режанинг тафсилотларига аниқлик киритмади. Венс каби у ҳам Украинанинг НАТОга аъзо бўлиши “АҚШ манфаатларига жавоб бермайди” деган фикрда.
Украина шартлари
Украина қўшинларни 1991 йил чегараларига олиб чиқишни назарда тутувчи “тинчлик формуласи”ни амалга оширишни талаб қилмоқда. Гап 2014 ва 2022 йилларда Россия томонидан у ерда ўтказилган “референдумлар” ва Украинанинг Қрим, Донецк, Луганск, Херсон ва Запорожье вилоятлари ноқонуний аннексия қилингани ҳақида кетмоқда. Москва “тинчлик формуласи” асосида музокаралар олиб бориш имкониятини истисно қилади.
Россия шартлари
Путин ўт очишни тўхтатиш учун ўз шартларини илгари сурди, жумладан, Украина қўшинлари ўзини ўзи мустақил деб эълон қилинган ДХР, ЛХР, Херсон ва Запорожье вилоятларидан олиб чиқилиши, ушбу тўртта ҳудуд ва Қрим гўёки халқаро миқёсда Россиянинг бир қисми сифатида тан олиниши, Украинанинг НАТОга аъзоликдан воз кечиши ва санкцияларни олиб ташлаш. Зеленский бу таклифни “ишониб бўлмайдиган” ультиматум деб атади.
Изоҳ (0)