Зеленский урушдан сўнг шоу-бизнесга қайтадими?

Украина президенти Владимир Зеленский урушда ғалаба қозонгач ва ўзининг президентлик муддати тугагач, катта саҳнага қайтишга тайёрлигини айтди.

Маълумки, Зеленский 2019 йилда президент этиб сайланишидан олдин “КВН”даги чиқишлари ва “Халқ хизматчиси” сериалидаги роли билан танилганди. Беш йил олдин эса у касбини тубдан ўзгартирган. Бироқ сиёсатчи яқинда Le Parisien нашрига берган интервьюсида мухлислар уни яна саҳнада кўришлари мумкинлигини истисно этмади. Ҳозирча у аниқ жавоб беришга қийналмоқда.

Тўғрисини айтганда, жавоб беришим қийин, билмайман. Менимча, бу умуман олганда одамнинг ички дунёсига боғлиқ, чунки бу уруш барчамизга таъсир қиляпти. Агар мен ичимдаги нарсаларни йўқотмасам, ким билади, бўлиши мумкин, дея фикр билдирди Зеленский.

Президент уруш тугаганидан кейин одатий фуқаролик ҳаёти билан шуғулланмоқчи. Зеленский яқинлари билан кўп вақт ўтказишни, улар билан телефонда эмас, жонли мулоқот қилишни истайди. Сиёсатчи фарзандлари ва рафиқаси билан кинотеатрга бориб, дам олишни орзу қилади.

Режаларим жуда кўп. Одамлар уруш бўлмаган пайтларда ҳар куни қиладиган ишлари билан шуғулланамиз. Болалар, оила, ота-оналар. Телефонда эмас, гаплашиб ўтирамиз. Ўғлим билан футбол ўйнайман, қизим билан университет ҳақида гаплашаман, хотиним билан хизмат сафарига бораман, дея қўшимча қилди Украина президенти.