Европарламент Украинага ёрдамни давом эттириш учун 19 ноябрь куни навбатдан ташқари фавқулодда йиғилиш ўтказади.
Бу ҳақда Брюсселдаги ялпи мажлисда Европа парламенти спикери Роберта Мецола маълум қилди.
“19 ноябрь соат 11:00 да навбатдан ташқари фавқулодда йиғилиш ўтказамиз. Йиғилиш мавзуси Украинани қўллаб-қувватлашга бағишланади. Украина президенти Владимир Зеленский ҳам бизга қўшилади”, деди у.
Европа иттифоқи вакиллари республикачи Дональд Трамп АҚШ президентлик сайловларида ғалаба қозонгач, Киевни қўллаб-қувватлашни тўхтатишидан чўчимоқда.
Украина бўйича махсус вакил
Аввалроқ Дональд Трамп Украинадаги можарони тинч йўл билан ҳал этиш бўйича музокаралар олиб бориш учун махсус вакил тайинлаш ниятида экани маълум қилинганди.
“Жуда тажрибали ва қобилиятли махсус вакил тайинланади, унга тинчлик битимини илгари суриш вазифаси юкланади”, деди Fox News телеканали манбаларидан бири.
Тахминларга кўра, бу лавозим худди 2017 йилдан 2019 йилгача Украина бўйича ихтиёрий равишда махсус вакил бўлган Курт Волкер каби пул тўланмайдиган бўлади.
Ғалаба режаси
Британиянинг Financial Times нашрига кўра, Дональд Трамп 2024 йил сентябрь ойида Украина давлати раҳбари Владимир Зеленский билан учрашувда ғалаба режасининг икки бандига қизиқиш билдирган.
“Украинанинг Европа ва АҚШдаги иттифоқчилари, жумладан, нуфузли республикачилар мамлакатга жиддий ёрдамни тўхтатишни эмас, балки Киев билан яқин ҳамкорликни рағбатлантирадиган таклифларни қандай ишлаб чиқиш бўйича маслаҳат берди”, дейилади хабарда.
Аввалроқ Зеленский Украина Олий Радасида ғалаба режасини тақдим қилган эди. Мазкур режа беш банддан иборат. Шунингдек, у учта махфий қоидани ўз ичига олади.
Изоҳ (0)