Агар Украина НАТОга қабул қилинса, Киев Россия билан урушнинг “қайноқ фазасини” тугатишга рози бўлади. Бу ҳақда Украина президенти Владимир Зеленский маълум қилди.
Унинг таъкидлашича, бой берилган ҳудудлардан воз кечиш ҳақида гап кетмаяпти. Зеленскийнинг сўзларига кўра, НАТО Украинани аннексия қилинган Қримни ўз ичига олган халқаро тан олинган чегаралари доирасида таклиф қилиши керак.
“Ишғол қилинган ҳудудларни кейинроқ, дипломатик йўл билан қайтариш мумкин. Агар биз урушнинг қизғин босқичини тўхтатмоқчи бўлсак, бизнинг назоратимиз остида бўлган Украина ҳудудини НАТО соябони остига олишимиз керак”, дейди у.
Унинг фикрича, буни тезда амалга ошириш керак. Альянсга аъзолик Россия президенти Владимир Путиннинг “қайтмаслигини” таъминлайди. Украина етакчисининг таъкидлашича, агар уруш НАТО хавфсизлик кафолатисиз шунчаки тўхтатиб қўйилса, у тез орада яна қайта бошланади.
Зеленскийнинг октябрь ойида оммага тақдим этган “ғалаба режаси”нинг биринчи банди Украина Шимолий Атлантика альянсига таклиф қилинишини назарда тутади.
Аввалроқ Ғарб Украинадаги урушни тугатиш бўйича “немис сценарийси”ни жиддий муҳокама қилаётгани, унда мамлакат НАТОга Россия томонидан босиб олинган ҳудудларсиз қўшилиши ҳақида хабар берилган эди.
“Агар истак бўлса, ҳар доим ечим бўлади. Чизиқ керак, унинг кесиб ўтиши 5-модданинг (иттифоқ уставини жамоавий ҳимоя қилиш тўғрисида) қўлланилишини белгилайди ва Украина бу чегарагача бўлган барча ҳудудни назорат қилиши керак. Бу халқаро тан олинган чегарага тўғри келмайдиган чизиқ бўлиши мумкин”, деган эди НАТОнинг собиқ раҳбари Столтенберг.
Шу билан бирга, FТ манбалари “ҳудудлар эвазига НАТО аъзолиги” ғоясини амалга оширишда қийинчиликлар мавжудлигини қайд этди. Бу қийинчиликлар ҳам Россиянинг Украинанинг альянсга аъзо бўлишига қатъиян қарши эканлиги, ҳам АҚШ ва блокнинг бошқа давлатлари бунга тайёрми-йўқми деган масалада аниқ тушунчанинг йўқлиги туфайли юзага келмоқда.
Июнь ойида Путин биринчи марта Киев билан тинчлик музокараларини бошлаш шартларини очиқлаган эди. Бу шартлар орасида НАТО ва бошқа ҳарбий иттифоқларга аъзо бўлишдан воз кечиш, шунингдек, Украина армиясини Луганск, Донецк, Запорожье ва Херсон вилоятларининг маъмурий чегараларидан олиб чиқиш ҳамда ушбу ҳудудлар устидан суверенитетни йўқотганлигини тан олиш мавжуд. Зеленский бу талабларни навбатдаги ультиматум деб баҳолаб, уларни муҳокама қилишни рад этган.
Изоҳ (0)