Россия президенти Владимир Путин Украина масаласи бўйича Москва ҳеч қандай дастлабки шартларсиз, бироқ Истанбул келишувлари ва жойлардаги реал вазиятга асосланиб мулоқот олиб боришга тайёр эканлигини маълум қилди.
Шунингдек, у Кремль Украинанинг исталган вакили, шу жумладан агар сайловларда қатнашиб, қонуний мақомга эга бўлса, Владимир Зеленский билан ҳам музокаралар олиб боришга тайёрлигини таъкидлади. Кремль шартномаларни фақат қонуний ҳокимият билан имзолашини айтди.
“Биз музокараларни олдиндан ҳеч қандай шарт қўймасдан, аммо 2022 йилда Истанбулда ўтказилган музокаралар жараёнида келишиб олинган асослар ва бугунги кунда ер юзида содир бўлаётган воқеликлар асосида олиб боришга тайёрмиз”, деди Путин тадбирда.
Президент Россиянинг тезислари аввалроқ, жумладан, июнь ойида Россия ТИВдаги нутқида баён этилганини қўшимча қилди.
“Агар кимдир Украинада сайловда иштирок этса, қонунийлик мақомига эга бўлади. Биз ҳар қандай одам билан, шу жумладан Зеленский билан ҳам, мулоқот қилишга тайёрмиз. Биз фақат қонуний ваколатга эга бўлган шахслар билан шартномалар имзолай оламиз. Рада ва Рада раиси эса қонуний ҳисобланади. У тўлиқ режим раҳбариятига бўйсунади. Бу фақатгина расмий юридик масаладир”, деди сиёсатчи.
Путин июнь ойида Украинага тинч йўл билан вазиятни ҳал қилиш бўйича таклиф билан чиққан эди. У можарони музлатишни эмас, балки уни тўхтатишни илгари суриб, Украина қўшинларини ЛХР, ДХР, Херсон ва Запорожье вилоятларидан олиб чиқишни, Украинанинг НАТОга қўшилиш режаларидан воз кечиш шартларини маълум қилганди.
Изоҳ (0)