Украина президенти Владимир Зеленскийнинг маслаҳатчиси Дмитрий Литвин Венгрия бош вазири Виктор Орбаннинг Рождество байрами арафасида Россия билан ўт очишни тўхтатиш ва кенг кўламли асирлар алмашинувини амалга ошириш ҳақидаги таклифига қарши чиқди.
Литвин Орбаннинг таклифини “ультиматум”, бош вазирнинг ўзини эса Россия тарафдори деб атади ва Киевга “Украина учун ишончли ва адолатли тинчлик” кераклигини айтди.
Ўт очишни тўхтатиш ташаббуси Венгрия бош вазири томонидан 11 декабрь куни Россия президенти Владимир Путин билан телефон орқали мулоқот вақтида илгари сурилган эди.
Москва Венгрия бош вазирининг таклифларига тезда жавоб қайтарган. Икки давлат раҳбарларининг суҳбатидан сўнг дарҳол Федерал хавфсизлик хизмати Венгриянинг Москвадаги элчихонасига асирларни алмаштириш бўйича таклифлар юборган. Россия президенти матбуот котиби Дмитрий Песков журналистларга Россия томони Венгрия бош вазирининг Украинадаги можарони тинч йўл билан ҳал қилиш ва асирлар алмашинуви билан боғлиқ гуманитар масалаларни ҳал қилишга қаратилган саъй-ҳаракатларини қўллаб-қувватлашини айтди.
Ўша куни Орбан бу таклифни Владимир Зеленский билан телефон орқали муҳокама қилишни истаган, бироқ Зеленский Венгрия бош вазири билан гаплашишни рад этган. Венгрия ТИВ раҳбари Петер Сийяртонинг қайд этишича, бу рад этиш “бир оз таранг, аммо хушмуомала тарзда” ифодаланган. Вазир буни “дипломатияда мутлақо мисли кўрилмаган ҳаракат” деб таърифлаган.
Изоҳ (0)