Россия президентининг матбуот котиби Дмитрий Песков The New York Times (NYT) нашрига берган интервьюсида айрим америкалик амалдорларнинг Украинага ядро қуролини бериш бўйича таклифларига муносабат билдирди.
Песковнинг сўзларига кўра, бундай ташаббуслар можаронинг авж олишидан манфаатдор “экстремистик қанот”дан чиқмоқда.
“Ҳатто эскалацияни кучайтиришга қаратилган энг провокацион чақириқлар ҳам ўта экстремистик қанотга эга. Бу уларга тегишли бўлган нуқтаи назар. Масъулиятни ҳис қилмайдиган одамларнинг масъулиятсиз фикрлашлари", деди Песков матбуот мулоқоти чоғида.
Кремль “Орешник” баллистик ракетаси қўлланилгандан кейин ядровий кучайиш хавфини кўряптими, деган саволга Песков қуйидагича жавоб берди: "Бу масалага тўғри баҳо бериш учун Россиянинг янгиланган ядро доктринаси ва Владимир Путиннинг сўнгги баёнотларини ўрганиш зарур".
Шунингдек, у Украинадаги можарода иштирок этаётган “коллектив Ғарб” давлатларининг ҳаракатларини баҳолашга чақирди.
19 ноябрь куни Россия президенти ядровий доктрина бўйича янгиланган давлат сиёсатининг асосларини тасдиқлади. Ҳужжатда ядро қуролидан фойдаланиш Россия Федерацияси суверенитети ва ҳудудий яхлитлигини ҳимоя қилишнинг охирги чораси деб аталади.
Шу билан бирга, энди ядро қуролига эга бўлмаган ҳар қандай давлатнинг ядро қуролига эга бўлган давлат иштирокида ёки қўллаб-қувватлаган ҳолда тажовуз қилиши уларнинг Россияга қўшма ҳужуми ҳисобланиши белгилаб қўйилди.
Аввалроқ Россия ташқи ишлар вазири Сергей Лавров мамлакат ҳар доим ядро уруши олдини олиш тарафдори эканини айтганди.
Вазирнинг сўзларига кўра, президент Владимир Путин бугун, 19 ноябрь куни маъқуллаган янгиланган Россия доктринасида Американинг ядро бўйича доктриналаридан фарқ қиладиган ҳеч нарса йўқ.
Изоҳ (0)