Rossiya tashqi ishlar vaziri Sergey Lavrov mamlakat har doim yadro urushi oldini olish tarafdori ekanini aytdi.
U Ukraina Qurolli kuchlari Amerikaning ATACMS raketalari bilan Bryansk viloyatiga bergan zarbasiga Rossiya qanday javob berishi mumkinligi haqidagi savolga shunday fikr bildirdi.
Lavrovning so‘zlariga ko‘ra, bunday hujumlarni Rossiya “G‘arb urushining sifat jihatidan yangi bosqichi” deb hisoblashi mumkin va ularga “mos ravishda” javob beradi.
“Biz yadroviy urushning oldini olish uchun hamma narsa qilinishi kerak degan pozitsiyaga qatʼiy amal qilamiz. Yadroviy qurol, eng avvalo, har qanday yadroviy urushni to‘xtatish, oldini olish, tiyib turish vositasi ekaniga aminmiz. Biz vaziyatga shunday yondashamiz”, dedi Rossiya TIV rahbari.
Vazirning so‘zlariga ko‘ra, prezident Vladimir Putin bugun, 19-noyabr kuni maʼqullagan yangilangan Rossiya doktrinasida Amerikaning yadro bo‘yicha doktrinalaridan farq qiladigan hech narsa yo‘q.
Yangi doktrinaga ko‘ra, Ukrainaning Rossiyaga qarshi G‘arbning yadrosiz raketalarini qo‘llashi yadroviy javob zarbasiga olib kelishi mumkin, deya tushuntirish berdi rasmiy Kreml.
Ayni paytda AQSH Milliy xavfsizlik kengashi vakili Bloomberg agentligiga Rossiyaning yadroviy doktrinasini yangilash qaroriga javoban Qo‘shma Shtatlar o‘zining yadroviy tiyib turish siyosatini o‘zgartirishga hojat yo‘qligini aytdi. Ismini oshkor etmagan amerikalik mulozimning qo‘shimcha qilishicha, AQSH prezidenti maʼmuriyati Rossiya tomonidan kiritilgan o‘zgarishlardan ajablanmagan.
Rossiya mudofaa vazirligi maʼlumotlariga ko‘ra, 19-noyabrga o‘tar kechasi Ukraina Qurolli kuchlari Bryansk viloyatiga oltita ATACMS raketasi bilan hujum qilgan. Bundan ikki kun oldin ommaviy axborot vositalari Qo‘shma Shtatlar Ukrainaga uzoq masofali raketalar bilan Rossiya Federatsiyasi hududiga zarbalar yo‘llashga ruxsat bergani haqida xabar qilgandi.
Amerika rasmiy vakillaridan hozirgacha faqat davlat kotibining G‘arbiy yarimshar bo‘yicha yordamchisi Brayan Nikols taqiq bekor qilinganini tasdiqladi.
Izoh (0)