Американинг The Wall Street Journal (WSJ) нашрининг Москвадаги бюроси журналисти Эван Гершковичга Россия тергов қўмитаси томонидан жосуслик бўйича айблов эълон қилинди, деб ёзмоқда “Интерфакс”.
“Гершковичга айблов эълон қилинди, у Россия Жиноят кодексининг 276-моддасида кўрсатилган жиноятни содир этганликда гумонланмоқда”, — дейилади нашр хабарида.
АҚШ фуқароси Гершковичнинг ҳибсга олингани ҳақида 30 март куни Россия ФХХ Жамоатчилик билан алоқалар маркази хабар берган эди. Шу куни Москванинг Лефортово суди тергов талабига биноан журналистни 29 майгача ҳибсга олди.
ФХХ тушунтиришича, Гершкович Екатеринбургда “махфий маълумот олишга уринаётганда” ушланган. Кейинроқ Россия президентининг матбуот котиби Дмитрий Песков журналист “жиноят устида қўлга олинганини” айтди.
АҚШ давлат котиби Энтони Блинкен Россия ташқи ишлар вазири Сергей Лавров билан суҳбатда WSJ журналистининг қўлга олинишидан хавотир билдирди ва уни зудлик билан озод этишга чақирди.
Бундан ташқари, Блинкен Америка фуқароларини зудлик билан Россияни тарк этишга чақирган. Польша ҳам ўз фуқароларидан Россияни тарк этишни сўраган.
The Wall Street Journal таҳририяти Россия элчиси ва барча россиялик журналистларни АҚШдан чиқариб юборишга чақирди. Bloomberg, The New York Times, The Washington Post ва Politico нашрлари ҳам Россиядан америкалик журналист Эван Гершковични озод қилишни талаб қилди.
Шунингдек, россиялик журналистлар ва жамоат арбоблари Гершковичга қўйилган айбловнинг мазмун-моҳияти ишончлилигига шубҳа билдириб, уни озод қилишга чақирди.
Изоҳ (0)