Кремль Туркия президенти Ражаб Тоййиб Эрдўғоннинг Украинадаги жанговар ҳаракатларни музлатиш ҳақидаги таклифини Москва учун номақбул деб атади.
“Жанг чизиғи бўйлаб ҳарбий ҳаракатларни музлатиш варианти Россия томони учун мантиққа тўғри келмайдиган нарса”, деди Россия президенти матбуот котиби Дмитрий Песков.
“Бу ҳолда, президент Путин томонидан ишлаб чиқилган июнь шартлари ўз долзарблигини тўлиқ сақлаб қолади. Ўша шартларда жангларни тўхтатиш учун нима қилиш кераклиги белгилаб қўйилган”, дея таъкидлади Песков.
“Россия ва Туркия етакчилари сўнгги учрашувларида Эрдўғоннинг Украинадаги ҳарбий амалиётларни тўхтатиш режасини муҳокама қилдими?”, деган саволга у шундай жавоб берди: “Йўқ, бу муҳокама қилинмади. Биз бу борадаги хабарларга эътибор қаратдик, аммо тўлиқ тафсилотлар ҳали йўқ. Эрдўғоннинг сўзларида гап нима ҳақида бораётганини билмаймиз”, деди Песков.
Аввалроқ Туркия президенти Ражаб Тоййиб Эрдўғон G20 саммитида Украинадаги можарони ҳозирги фронт чизиғида музлатиб қўйишни таклиф қилиши хабар берилганди.
Манбаларнинг таъкидлашича, Эрдўғон ўз ташаббусини бугун, 18 ноябрь куни бўлиб ўтадиган давлатлар раҳбарлари учрашувида тақдим этади.
Туркиянинг таклифи Донбассда қуролсизлантирилган ҳудуд яратиш ва Украинанинг НАТОга киришини кечиктиришни ўз ичига олиши мумкин. Бунинг эвазига Туркия раҳбари Украинага хавфсизлик кафолатлари ва ҳарбий таъминотни давом эттиришни таклиф қилиши кутилмоқда.
Бугун, 18 ноябрь куни АҚШ президенти Жо Байден Украинага Россия ҳудудидаги нишонларга зарба бериш учун узоқ масофали ATACMS ракеталаридан фойдаланишга рухсат бергани ҳақида хабарлар пайдо бўлди.
АҚШ ҳукуматидаги манбаларга кўра, бу зарбалар биринчи навбатда Курск вилоятидаги Россия ва Шимолий Корея ҳарбий хизматчиларига қаратилган бўлади. Байденнинг қарори АҚШ сиёсатидаги туб ўзгариш бўлиб, у қайта сайланган Дональд Трампнинг инаугурациясидан икки ой олдин қабул қилинди.
Шунингдек, Украинага ATACMS ракеталаридан фойдаланишга рухсат бериш Россиянинг Шимолий Корея қўшинларини жангга юбориш ҳақидаги кутилмаган қарорига жавоб экани таъкидланган.
Изоҳ (0)