Россияда мигрантларга вақтинчалик яшаш рухсатномаси ва фуқароликни беришни тақиқлаш таклиф этилмоқда. Бу ҳақда “Адолатли Россия” партияси депутатларига таяниб, “Коммерсант” хабар берди.
Гап ташкилий танлов асосида ишга жалб қилинадиган мигрантлар ҳақида бормоқда. Депутатлар бундай ишчиларнинг оила аъзолари ва қариндошларига мамлакатга киришни тақиқлаш тарафдори.
Ташкилий ишга қабул қилиш доирасида жалб қилинадиган малакасиз хорижлик ишчилар Россияда вақтинчалик яшаш рухсатномаси, шунингдек Россия фуқаролигини олиш ҳуқуқига эга бўлмаслиги керак, дейилади ташаббусда.
Шунингдек, мигрантнинг Россияда бўлиш муддатини унинг меҳнат шартномаси муддати билан чеклаш таклиф қилинмоқда. Шартнома тугагандан сўнг ходим мамлакатни тарк этиши керак, иш берувчи эса унинг кетишини таъминлаши шарт.
Россиядан депортация қилинган муҳожирлар сони кўпайди
Россия ички ишлар вазири Владимир Колоколсев мамлакатдан чиқариб юборилаётган муҳожирлар сони ошганини айтди. Россия ИИВ маълумотларига кўра, 2015 йилдан буён депортация қилинган муҳожирлар сони бир ярим баробарга ортган.
Мамлакатда бўлиш тартибини бузгани учун депортация қилинган хорижликлар сони 15 фоизга ошган. Бундан ташқари, 34 минг нафар муҳожирнинг Россияда вақтинча бўлиш муддати қисқартирилган, 180 минг нафар хорижликка мамлакатга кириш тақиқланган.
Мигрантларнинг рус тилини ўрганиши бўйича чақириқлар
Россия президенти Владимир Путин 5 ноябрь куни рус тилини кам ёки умуман билмайдиган хорижлик болалар билан ишлаш алгоритмини ишлаб чиқишга чақирди. У рус тилини билишга қўйиладиган талаб даражаларини аниқлаш ва мустаҳкамлашни топширди.
Июль ойида “Рособрнадзор” раҳбари Анзор Музаев рус тилини билмайдиган мигрант болаларни мактабга қабул қилмасликни таклиф қилганди. У чет эл фуқаролари оилалари билан Россияга кўчиб келган бўлса ва бу ерда яшашни режалаштираётган бўлса, уларнинг фарзандлари рус тилини ўрганиши кераклигини айтган.
Июнь ойида Инсон ҳуқуқлари бўйича кенгаш раҳбари Валерий Фадеев мактабда “рус тилини билмайдиган бирорта ҳам бола рўйхатда турмаслиги керак”лигини айтган.
Изоҳ (0)