“Украинага Европа Иттифоқининг дронлари керак эмас” — Боррел

Киевда бўлиб турган Европа Иттифоқи дипломатияси раҳбари Жосеп Боррелнинг айтишича, Украина Европа Иттифоқидан дронлар етказиб беришни талаб қилмайди, чунки давлатнинг ўзи учувчисиз аппаратларни ишлаб чиқаради.

“Уларга дронлар керак эмас. Мен бир нечта заводларни бориб кўрдим ва украиналик муҳандисларнинг юқори сифатли дронлар яратиш қобилиятидан жуда ҳайратда қолдим”, — деди Боррел журналистларнинг саволига жавоб берар экан.

Аввалроқ Россия Украинага қурол етказиб берилаётгани юзасидан НАТО давлатларига нота юборган эди. Россия ташқи ишлар вазири Сергей Лавров Украина учун қурол бўлган ҳар қандай юк Россия учун қонуний нишонга айланишини таъкидлади.

Россия Ташқи ишлар вазирлиги НАТО давлатлари Украинага қурол етказиб бериш орқали “ўт билан ўйнашмоқда” деган. Россия президенти матбуот котиби Дмитрий Песков Украинани Ғарбдан қурол-яроғ билан таъминлаш Россия-Украина музокараларининг муваффақиятига ҳисса қўшмаслиги ва салбий таъсир кўрсатишини айтиб ўтган.