Буюк Британия яқинда Украинага Storm Shadow узоқ масофага учувчи қанотли ракеталарнинг янги партиясини юборди. Бу ҳақда Bloomberg хабар берди.
Етказиб бериш Британия ва АҚШ ўзининг узоқ масофали ракеталарини Россия ҳудудига учиришга рухсат бериши тўғрисидаги қароридан олдин амалга оширилган. Гап ўнлаб Storm Shadow қанотли ракеталари ҳақида бормоқда.
Лондондан ва Вашингтоннинг қарорларига Россия урушда шимолий кореялик ҳарбийлардан фойдаланаётгани туртки бўлди. Украина президенти Владимир Зеленский бунгача бир неча бор Ғарб қуроллари билан Россияга ҳужум қилиш учун рухсат ололмаганди.
Бироқ рухсат бериш қарори президент Жо Байден ва унинг иттифоқчилари томонидан Украинани музокараларда кучайтириш учун қабул қилинган бўлиши мумкин. Чунки янги сайланган президент Дональд Трамп урушни тезда тугатишга ваъда берган, у Украинага ҳарбий ёрдамни қисқартирмоқчи.
Манбалар ракеталар қачон етказиб берилгани ва уларнинг сонини хавфсизлик юзасидан ошкор этмаган. Storm Shadow ракеталарининг янги партиясини Украинага топшириш биринчи марта Британия бош вазири Кир Стармер даврида бўлиб ўтди. Сиёсатчи Украинани Россиянинг ҳарбий тажовузига қарши ўз-ўзини ҳимоя қилишда қўллаб-қувватлашни давом эттиришга ваъда берган.
Оммавий эълон қилинмаган етказиб беришлар бир неча ҳафта олдин бўлиб ўтган ва Киевда узоқ масофали ракеталар тугагандан кейин буюртма қилинган, дейди манбалар.
Изоҳ (0)