Россия кескин демографик вазият фонида мамлакатни жадал ривожлантириш учун турли давлатлардан келган меҳнат мигрантларига муҳтож. Бу ҳақда Россия президенти матбуот котиби Дмитрий Песков “РИА Новости”га берган интервьюсида маълум қилди.
Мигрантлар бу — эҳтиёж. Гап шундаки, бизнинг демографик вазиятимиз жуда мураккаб. Биз дунёдаги энг катта мамлакатда яшаймиз, аммо аҳолимиз кам. Албатта, динамик ривожланишимиз ва барча тараққиёт режаларимизни амалга оширишимиз учун ишчи кучига эҳтиёжимиз бор. Биз уларни фақат хуш кўрамиз, деди у.
Песковнинг таъкидлашича, миграцияни “худди ишчи мигрантларни қабул қиладиган кўплаб мамлакатлардаги каби етарлича қатъий тартибга солиш ва йўлга қўйиш керак”.
Шунингдек, биз мигрантлар орасидаги жиноятчиликдан ҳимоя қиладиган аниқ, қатъий, аммо қулай қоидаларни ишлаб чиқишимиз зарур, деди Кремль вакили.
Ноябрь ойи бошида Россия президенти Владимир Путин Россия ҳукумати мигрантларни жалб қилиш масалаларида биринчи навбатда Россия фуқаролари манфаатларини ҳисобга олиши кераклигини айтганди. У Россияга ишлаш учун келган хорижликлар агар рус тилини яхши билса, рус анъаналарини ҳурмат қилса ва қонунчиликка риоя этса, салбий муносабатга дуч келмаслигини билдирган.
Изоҳ (0)