Германия канцлери Олаф Шольц Владимир Путинга қўнғироқ қилмоқчи, дея Bloomberg хабар берди.
“Россия президенти Владимир Путин ва Германия канцлери Олаф Шольц жума куни телефон орқали мулоқот қилишни режалаштирмоқда”, деб ёзади нашр.
Шольц ҳафта бошида АРД телеканалига берган интервьюсида Россия раҳбари билан мулоқот қилиш режаларини маълум қилган эди. У Путин билан гаплашиш учун “муносиб вақт” тез орада келишини айтган.
Канцлер узоқ вақтдан бери бундай мулоқот олдидан кўплаб алоқаларни амалга ошириб келаётганини қўшимча қилган.
Кремль матбуот котиби Дмитрий Песков, ўз навбатида, Москва Берлиндан суҳбатга ҳозирча ҳеч қандай сигнал олмаганини қайд этган. Шу билан бирга, у Путин Валдай форумида барча алоқаларга очиқлигини яна бир бор таъкидлаганини эслатган.
Россия президентининг расмий сайти маълумотларига кўра, Путин ва Шольц ўртасидаги сўнгги суҳбат 2022 йил 2 декабрьда бўлиб ўтган, унинг асосий мавзуси Украинадаги вазият бўлган.
Шольц аввалроқ Россия президенти билан Украинадаги можарони ҳал қилиш мавзусини муҳокама қилишга тайёрлигини тасдиқлаган эди. У можарони ҳал қилиш учун аниқ тамойилларга амал қилиш зарурлигини айтиб, ҳар қандай қарор Украина иштирокида, шунингдек, Германиянинг ҳамкор давлатлари келишуви билан қабул қилиниши кераклигини қўшимча қилган.
Сиёсатчи, шунингдек, Украинадаги можарони муҳокама қилиш мақсадида Москва ҳам, Киев ҳам иштирок этадиган тадбир ўтказиш учун шароит яратиш кераклигини таъкидлаган эди.
Изоҳ (0)