Россия Ядровий хавфни камайтириш миллий маркази орқали “Орешник”нинг ишга туширилиши ҳақида АҚШни автоматик равишда огоҳлантирди. Бу ҳақда Россия президентининг матбуот котиби Дмитрий Песков маълум қилди.
Россия америкаликларни автоматик равишда ишлайдиган ва АҚШдаги шунга ўхшаш тизим билан доимий алоқада бўлган Россия Ядровий хавфни камайтириш миллий маркази орқали “Орешник” ишга туширилиши ҳақида огоҳлантирди, деди Песков.
Унинг қайд этишича, “огоҳлантириш автоматик режимда ишга туширилишидан 30 дақиқа олдин юборилган”.
Кремль вакилига кўра, Россия “Орешник” учирилиши ҳақида Америка томонини келишувларга ҳамда “қитъалараро баллистик ракеталарни учириш тўғрисида хабардор қилиш режими”га мувофиқ хабардор қилмаган, чунки “Орешник” қитъалараро стратегик ракета эмас.
Бу ўрта масофага мўлжалланган қурол, дея қўшимча қилган сиёсатчи.
Путин АҚШнинг Ўрта ва узоқ масофаларга мўлжалланган ядровий кучлар шартномасини бир томонлама йўқ қилиш қарорини хато деб атади. У, шунингдек, Россия ўз қуролларини Россия нишонларига қарши ишлатадиган мамлакатларнинг ҳарбий нишонларига қарши қурол ишлатиш ҳуқуқига эга эканлигини таъкидлади.
Путин 21 ноябрь куни Украинадаги объектга баллистик ракета зарбаси берилганини тасдиқлаган эди.
Унинг сўзларига кўра, синовлар муваффақиятли ўтган, армия кўзланган мақсадга эришган: “Днепропетровскда Совет иттифоқи давридан бери энг йирик ва машҳур саноат мажмуаларидан бири бўлган, бугунги кунда ракета технологиялари ва бошқа қуроллар ишлаб чиқарадиган Южмаш заводи зарар кўрган”.
“Шу пайтдан бошлаб, биз бир неча бор таъкидлаганимиздек, аввалроқ Ғарб томонидан қўзғатилган Украинадаги минтақавий можаро глобал миқёсда тус олди”, деди Россия етакчиси.
Путин ўз баёнотида Россия ракеталардан фойдаланишдан олдин Украина фуқароларини хавфли зонани тарк этиш ҳақида огоҳлантиришини таъкидлади.
“Россия тинч йўлни афзал кўради, бироқ воқеаларнинг ҳар қандай ривожига ҳам тайёр, жавоб доимо тайёр”, дея қўшимча қилган у.
Изоҳ (0)