Европа иттифоқи Украинани мунтазам қўллаб-қувватлашига қарамай, Россия билан қарама-қаршиликда уни етарлича ресурслар билан таъминлай олмади, дея тан олди Европа иттифоқининг ташқи ишлар бўйича Олий вакили Жосеп Боррел.
У ўз блогида Европа иттифоқи дипломатияси раҳбари сифатидаги мандати сарҳисоб қилинган мақола чоп этди. Боррел ноябрь ойи охирида ўз лавозимини тарк этади.
“Биз Украинага молиявий, гуманитар ва ҳарбий ёрдамимизни давом эттирдик. Шу пайтгача бу мақсадлар учун 122 миллиард евро, жумладан, ҳарбий ёрдам учун 45 миллиард евро ажратдик. Шунингдек, яқинда Россиянинг музлатилган активларидан тушган маблағни Украина учун ишлатишга қарор қилдик”, деб ёзди у.
“Аммо буларнинг барчасига қарамай, биз Украинани ўзини ҳимоя қилиш учун етарли ресурслар билан таъминлай олмадик. Қиш украиналиклар учун жуда оғир бўлади, электр таъминотида катта узилишлар бўлади. Шунингдек, Украинага, ўқ-дориларни вақтида етказиш бўйича етарлича ёрдам бера олмадик”, давом этди дипломат.
Боррелнинг сўзларига кўра, Украинада содир бўлаётган воқеалар “Европа иттифоқи учун экзистенсиал таҳдиддир”.
“Бу глобал миқёсдаги дунё тартибининг йўқ қилинишига олиб келади. Мазкур ҳолат европаликларни ўз хавфсизлиги ҳақида қайғуришга кўпроқ ундаши керак”, дея қўшимча қилди Боррел.
Аввалроқ Жосеп Боррел 2024 йил охиригача Европа иттифоқи Украинага 1 миллион ўқ-дори юбориш режасини бажаришини айтганди.
Унга кўра, Украина қуролли кучлари аллақачон 980 минг дона снаряд олган. Бошқа келишувлар ва ташаббусларни ҳисобга олган ҳолда, Украина йил охиригача Европадан 1,5 миллионта снаряд олиши маълум қилинган.
Европа иттифоқи олий вакилининг сўзларига кўра, снарядларни Украинага етказиб бериш муддатлари ишлаб чиқариш қуввати пастлиги сабабли кечиктирилган. Унинг аниқлик киритишича, Европа иттифоқи ишлаб чиқариш қувватини оширди, бу эса Украина Қуролли кучларини ҳозирги даражада ўқ-дорилар билан таъминлашни давом эттириш имконини беради.
Изоҳ (0)