Чеченистон раҳбари Рамзан Қодиров агар Россия президенти Владимир Путиндан буйруқ олса, чечен бўлинмалари ҳатто Америкага ҳам бориши мумкинлигини айтди.
“Агар Олий бош қўмондон тегишли буйруқ берса, биз ҳатто Америкага ҳам боришга тайёрмиз, Молдовани анча ортда қолдирамиз. Бундай буйруқлар муҳокама қилинмайди, амалга оширилади. Уни татбиқ этиш учун бизда барча зарур куч, восита ва техника мавжуд”, — деди у.
Шу тариқа Рамзан Қодиров Украина Миллий хавфсизлик ва мудофаа кенгаши котиби Алексей Даниловнинг Россия чечен бўлинмаларини Молдовага юбориши мумкинлиги ҳақидаги баёнотига муносабат билдирди.
Қодировнинг таъкидлашича, бундай “ўзига ишонган мутахассислар” Россиянинг режаларигача “анча ўқиши керак”, Ғарбнинг “Россияни парчалашга уринишлари” эса 1990 йиллардан бери давом этмоқда.
Аввалроқ Украина президенти Владимир Зеленский Молдова президенти Майя Сандуга “Молдовадаги сиёсий вазиятни йўқ қилиш бўйича Россиянинг батафсил режаси”ни ифодаловчи ҳужжатни топширганини маълум қилганди. Россия президенти матбуот котиби Дмитрий Песков нима ҳақида гап бораётганини билмаслигини айтиб, журналистга жавоб олиш учун Зеленскийнинг ўзи билан боғланишни маслаҳат берди.
Аввалроқ Россия ташқи ишлар вазири Сергей Лавров Ғарб давлатлари Молдовани “навбатдаги Украина” сифатида кўраётганини айтганди. Молдова Украинадаги уруш туфайли Россия билан алоқаларни узган. Молдова разведкаси раҳбари Россия қўшинларининг Украина орқали Молдова томон ҳаракатланиши хавфини “реал ва жуда юқори” деб атаган.
Изоҳ (0)