Кремль Россия президенти Владимир Путиннинг 2023 йил октябрь ойида бўлиб ўтадиган “Бир макон, бир йўл” форумида иштирок этиш учун Хитойга ташрифига тайёргарлик кўрмоқда. Бу ҳақда манбаларга таяниб, Bloomberg хабар берди.
Россия президенти Хитой раҳбари Си Цзиньпиннинг тадбирда иштирок этиш таклифини қабул қилгани айтилмоқда.
Агар маълумотлар тўғри бўлса, бу Путиннинг узоқ вақт давомидаги илк хорижий сафари бўлади. У яқинда бўлиб ўтган БРИКСнинг 15-саммитида видеоалоқа орқали иштирок этганди, шунингдек, сентябрь ойида бўлиб ўтадиган G20 саммитида ҳам қатнашмайди. Россия делегациясига Россия ташқи ишлар вазири Сергей Лавров бошчилик қилади.
Путин Хитойга охирги марта 2022 йил февралида, уруш бошланиши арафасида ташриф буюрганди. Ўшанда у Пекиндаги Қишки Олимпиадада қатнашган ва Си Цзиньпин билан музокаралар олиб борган.
Хитой раҳбари 2023 йилнинг март ойида Москвага ташриф буюрган эди.
Июль ойида Федерация Кенгашининг халқаро алоқалар бўйича қўмитаси раисининг биринчи ўринбосари Андрей Денисов Россия президентининг октябрь ойида бўлиб ўтадиган “Бир макон, бир йўл” форумида иштирок этиши кутилаётганини маълум қилганди. Кремль матбуот котиби Дмитрий Песков президентнинг Хитойга ташрифи “кун тартибида” эканини тасдиқлаган, бироқ вақтини очиқламаган.
Изоҳ (0)