Янги Зеландия Украинага 16 миллион доллар миқдорида ёрдам ажратади

Янги Зеландия Украинага 25,9 миллион Янги Зеландия доллари (16,01 миллион АҚШ доллари) миқдорида ёрдам беришни режалаштирган. Икки йиллик ёрдамнинг умумий қиймати 61,8 миллион АҚШ долларидан ошади. Бу ҳақда ҳукумат баёнотига таяниб, РИА хабар берди.

Ушбу ёрдам пакетининг қарийб 4 миллион доллари Киевга қурол сотиб олиш учун Британия фондига, 4,3 миллион доллари гуманитар ёрдамга, 1,8 миллион доллари Жаҳон банкининг Украинани қайта тиклаш жамғармасига йўналтирилади.

Аввалроқ Россия Украинага қурол етказиб бериш юзасидан НАТО давлатларига мурожаат қилган эди. Россия ташқи ишлар вазири Сергей Лавров Украинага юборилган ҳар қандай юк Россия учун қонуний нишонга айланишини айтган. Унинг таъкидлашича, АҚШ ва НАТО Украинадаги можарода нафақат қурол-яроғ етказиб бериш, балки Буюк Британия, Германия, Италияда ҳарбий кадрлар тайёрлаш орқали ҳам бевосита иштирок этмоқда.

Россия президенти матбуот котиби Дмитрий Песков Украинага Ғарбдан қурол-яроғлар юборилиши Россия—Украина музокараларининг муваффақиятига салбий таъсир кўрсатишини қўшимча қилган.  
​