АҚШ тадқиқотчилари сунъий йўлдош тасвирлари асосида Шимолий Корея баллистик ракеталар ишлаб чиқариш заводларини кенгайтираётганини аниқлади. Россия бу ракеталардан Украинага қарши урушда фойдаланмоқда, деб ёзди Reuters.
“11 февраль” заводи номи билан танилган объект КХДРнинг шарқий соҳилидаги Хамхун шаҳрида жойлашган Рёнгсонг машинасозлик мажмуасига тегишли. У Ғарбда “КН-23” деб номланадиган “Хвасон-11” тоифасидаги қаттиқ ёнилғили баллистик ракеталар ишлаб чиқарувчисидир.
-oPjWu9ok.jpg)
Октябрь ойида Planet Labs томонидан олинган завод ҳудудининг сунъий йўлдош тасвирларини америкалик тадқиқотчилар ўрганиб чиқди. Янги суратлар қўшимча йиғув корпуси ва ишчилар учун турар жой биноси қурилаётганини кўрсатмоқда. Мажмуанинг ерости иншоотларига кириш жойлари ҳам янгиланмоқда.
Тадқиқотчи Сем Лейрга кўра, янги йиғиш корпуси олдинги бинодан 60-70 фоиз каттароқ, бу эса заводнинг ишлаб чиқариш қувватини сезиларли даражада оширади. Илгари кўприк крани билан тўсилган туннелларга кириш чекловлари олиб ташланган.
Биз буни улар завод унумдорлигини сезиларли даражада ошираётгани ёки оширишга уринаётгани сифатида кўриб чиқяпмиз, деди Лейр.
Яна бир илмий ходим Майкл Дуйцман сунъий йўлдош тасвирларидаги янги иншоот омборхона бўлиши мумкинлигини айтди. Бироқ тадқиқотчи бу янги ракета йиғиш линияси эканини истисно этмаган.
Сунъий йўлдош тасвирларини қайта ишлаш билан шуғулланувчи SI Analytics компаниясининг жанубий кореялик тадқиқотчилари ҳам завод ҳудудида янги қурилиш ишлари олиб борилаётганини тасдиқлаган.
КХДР Россияга ҳарбийлар борасида ёрдам бермоқда
Октябрь ойида Украина президенти Владимир Зеленский Шимолий Корея ўз аскарларини Россияга ёрдам бериш учун юборганини айтганди. Кейинчалик бу маълумотни Жанубий Корея разведкаси ва Пентагон тасдиқлаган. Жанубий Корея разведкаси Москва Пхеньянга ҳар бир ҳарбий хизматчи учун икки минг доллар тўлаётгани, бу оддий КХДР фуқаросининг 83 йиллик маошига тенг эканини маълум қилган.
Ноябрь ойида АҚШ давлат департаменти Россияга ёрдам бериш учун юборилган шимолий кореялик аскарларнинг аксарияти аллақачон Курск вилоятидаги жангларда қатнашаётганини айтган. Зеленский улар сезиларли йўқотишларга учраётганини маълум қилган.
Изоҳ (0)