НАТО иттифоқ давлатлари билан қуролли можаро юзага келган тақдирда Россия ҳудудига “юқори аниқликдаги зарбалар” беришни муҳокама қилмоқда. Бу ҳақида НАТОнинг ҳарбий қўмитаси раҳбари адмирал Роб Бауэр маълум қилди.
У НАТО ўзининг мудофаа иттифоқи сифатидаги моҳиятига муносабатини ўзгартирганини ижобий деб атади.
Бундан ташқари, Роб Бауэр “қачон бизга ҳужум қилишаркин, биз шундан кейингина ҳаракатни бошлаймиз” қабилидаги қараш ҳам ўзгарганини эътироф этди.
“Агар Россия бизга ҳужум қилса, кутиб ўтириш эмас, балки Россиянинг зарба йўлловчи қурилмаларини йўқ қилишга уриниш оқилона қарор бўлади. Бизга ҳужум уюштиришда ишлатиладиган қурилмаларни йўқ қилиш учун аниқ зарбалар комбинацияси керак ва биз биринчи бўлиб зарба беришимиз керак”, дея қўшимча қилди Бауэр.
Аввалроқ Европа давлатлари ўз қўшинларини Украинага юбориш эҳтимолини муҳокама қилаётгани хабар берилганди.
Гап биринчи навбатда Франция ва Буюк Британия ҳақида кетмоқда. Бу масала 2024 йил февраль ойида ҳам муҳокама қилинган. Бироқ Европа иттифоқининг барча давлатлари ҳам таклифни қўллаб-қувватламаган.
Ле Монде манбасига кўра, Франция ва Британия ўртасида Россия-Украина можароси доирасида “мудофаа соҳасидаги ҳамкорлик” бўйича музокаралар олиб борилмоқда. Бунга 11 ноябрь куни Британия бош вазири Кир Стармернинг Францияга ташрифи туртки бўлган. Ҳозирда музокаралар “махфий тарзда” кечмоқда.
Ғарб қўшинларини урушга юбориш Европа иттифоқининг 2025 йил январида Дональд Трамп президентлик лавозимини эгаллаганидан сўнг АҚШ Украинага ёрдамни қисқартириши мумкинлиги ҳақидаги хавотирларига боғлиқ.
22 ноябрь куни НАТО бош котиби Марк Рютте АҚШнинг сайланган президенти Дональд Трамп билан илк учрашувини ўтказганди.
Томонлар “альянс олдида турган глобал хавфсизлик масалаларини” муҳокама қилдилар, деб хабар берган НАТО матбуот котиби.
Washington Post газетаси НАТО бош котиби Дональд Трамп билан Россия-Украина можаросини тинч йўл билан ҳал қилиш стратегиясини муҳокама қилишини маълум қилган.
Изоҳ (0)