АҚШ президенти Жо Байден администрацияси Украинанинг 4,65 миллиард долларлик қарзини сўндириш нияти ҳақида Конгрессни хабардор қилди. Бу ҳақда Bloomberg хабар берди.
Ушбу сумма апрель ойида тасдиқланган 61 миллиард долларлик ёрдам пакети доирасида тақдим этилган 9 миллиард долларнинг ярмини ташкил этади. Бу маблағлар, бошқа ёрдамлардан фарқли ўлароқ, шартли қайтариладиган қарз сифатида берилиши ва зарурат туғилганда АҚШ президенти ушбу сумманинг 50 фоизидан кечиши мўлжалланганди.
Давлат департаментига кўра, қарзни ҳисобдан чиқариш “Украина ғалаба қозонишига ёрдам беради, Қўшма Штатлар ва унинг Европа иттифоқи, G7+ ҳамда НАТОдаги ҳамкорларининг миллий манфаатларига мос келади”.
Байден сайланган президент Дональд Трамп Оқ уйга келишидан олдин Украинага иложи борича кўпроқ ёрдам бермоқчи. Қарздан кечиш таклифи республикачиларнинг эътирозига сабаб бўлмоқда. Жумладан, сенатор Ренд Пол “Байден маъмуриятининг Украина қарзи учун масъулиятни Америка халқига юклашига йўл қўймаслик учун Конгресснинг юқори палатасида овоз беришга эришишини айтди.
Bloomberg таъкидлашича, Полнинг резолюцияси Конгресснинг иккала палатаси томонидан маъқулланиши керак, аммо Сенатни демократлар назорат қилишини инобатга олса, бу эҳтимолдан йироқ. Бундан ташқари, Жо Байден ҳужжатга вето қўйиши ҳам мумкин.
Изоҳ (0)