АҚШ Мудофаа вазирлиги Украинага 275 миллион долларлик янги ҳарбий ёрдам пакетини юборади. Бу ҳақда номи ошкор қилинмаган америкалик расмий шахсларга таяниб, Associated Press хабар берди.
Тўплам таркиби бўйича батафсил маълумотлар ҳозирча эълон қилинмаган. АҚШ Давлат департаменти Украинага 100 миллион долларлик мудофаа ускуналари ва хизматларини сотишга рухсат берган. Бу транспорт воситаларини капитал таъмирлаш, техник қўллаб-қувватлаш, ўқитиш ва “логистиканинг бошқа тегишли жиҳатлари”ни ҳам ўз ичига олади.
Бундан ташқари, Вашингтон ва Киев Украина учун 20 миллиард долларлик кредит шартлари бўйича музокараларнинг “илғор босқичи”да турибди. Кредитни тўлаш Россиянинг Украинага босқинидан сўнг музлатилган Россия Марказий банки активлари ҳисобидан амалга оширилади.
Associated Press билан суҳбатлашган икки манбага кўра, АҚШнинг амалдаги президенти Жо Байден маъмурияти жараённи йил охиригача якунлашга интилмоқда.
Россияга АҚШ ракеталари билан зарба бериш қарори
17 ноябрь куни The New York Times газетаси ва Reuters агентлиги манбаларга таяниб, АҚШ президенти Жо Байден Украинага АҚШ томонидан етказиб берилган узоқ масофали ATACMS ракеталаридан Россия ҳудудига зарба бериш учун фойдаланишга рухсат берганини хабар қилди.
19 ноябрь куни АҚШ давлат департаменти вакили Брайан Николс бу маълумотни расман тасдиқлади. Дональд Трамп президентлик лавозимини эгаллаганидан кейин Байденнинг бу қарорини бекор қиладими ёки йўқ, ҳозирча номаълум.
Россиянинг янгиланган ядровий доктринаси
Ўз навбатида, Россияда янги ядро доктринаси тасдиқланди. Ҳужжатдаги асосий ўзгаришлар шундан иборатки, ҳар қандай ядровий бўлмаган давлатнинг, аммо ядровий давлат иштирокида ёки қўллаб-қувватлаган ҳолда Россияга қарши тажовузи уларнинг Россияга биргаликдаги ҳужуми сифатида баҳоланади.
Бундан ташқари, доктринага кўра, агар “Россия суверенитетига жиддий таҳдид ва оддий қуроллар билан хавф” юзага келса, Россия ядро қуролини қўллаши мумкин. Бироқ, ҳужжатда “жиддий таҳдид” тушунчасига аниқлик киритилмаган.
Оқ уйга Киевга ёрдам кўламини танқид қилувчи шахс келади
Икки ойдан сўнг Байденнинг ўрнини Оқ уйда Дональд Трамп эгаллайди. У АҚШнинг Киевга кўрсатаётган молиявий ва ҳарбий ёрдами кўламини бир неча бор танқид қилган. Сиёсатчи Украинадаги урушни 24 соат ичида тугатишни ваъда берган, аммо бунинг аниқ усулини тушунтирмаган. Трамп очиқчасига Украина халқаро миқёсда тан олинган ҳудудининг бир қисмидан воз кечиши ва шу орқали жанглар тугашига ҳисса қўшиши кераклигини айтганди.
Изоҳ (0)