“Дарё” нашри 27 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Қримдан бошланган можаро Қримнинг қайтарилиши билан якунланадими?
Украина президенти ўз саҳифасида 2014 йилда Қрим парламенти биноси ёнида бўлиб ўтган митингга бағишлаб хабар жойлаштирди.
“Россия агрессияси тўққиз йил аввал Қримдан бошланганди. Қримни қайтариш орқали биз тинчликни тиклаймиз. Қрим озод бўлади!” — дейилади Зеленскийнинг постида.
2014 йилнинг 26 февралида россияпараст ва украинапараст фаоллар Симферополдаги парламент биноси яқинида кенг кўламли митингга тўпланишган. Иккинчи гуруҳга қрим-татар халқ мажлиси бошчилик қилган. Митинг иштирокчилари ўртасида тўқнашувлар бўлиб ўтиб, ўттизга яқин киши яраланган, икки киши ҳалок бўлган. Мана шу акциядан бир ой ўтмай, Россия Қримни аннексия қилди.
Қуролларни тарқатмаслик шартномасининг тўхтатилиши ортидан янги ҳарбий машғулотлар эълон қилинди.
Ҳозирда бир қатор украиналик ҳарбийлар ва ғарб экспертлари Украина 2023 йил давомида Қримни озод қила олади, деб ҳисобламоқда. Бироқ бунга эришиш учун Ғарб давлатлари Украина Қуролли кучларига керакли барча қуролларни етказиб беришлари зарурлиги таъкидланади.
Эслатиб ўтамиз айни вазиятда Владимир Путин Россиянинг Стратегик ҳужум қуролларини тарқатмаслик тўғрисидаги шартномадаги иштирокини тўхтатган.
Ушбу жараёнда Германия Путинга сигнал сифатида АҚШ ва Польша билан ҳарбий машғулотлар ўтказишини эълон қилди
Хитойнинг “тинчлик режаси” қандай мақсадни кўзлаган, Хитой ва Тайван ўртасидаги ҳарбий можаро шубҳа остида
Украинада уруш бошланганининг бир йиллиги муносабати билан Пекин 12 банддан иборат “тинчлик режаси”ни эълон қилганди. Унда Хитой томони, хусусан, барча давлатларнинг суверенитети ва ҳудудий яхлитлигини ҳурмат қилиш, совуқ уруш менталитетидан воз кечиш, ҳарбий ҳаракатларни тўхтатиб музокараларни қайта бошлашни ва бир томонлама санкцияларни бекор қилиш таклифларини берган.
Шундан сўнг, Россия Ташқи ишлар вазирлиги “хитойлик дўстларининг Украинадаги можарони тинч йўл билан ҳал қилишга ҳисса қўшишга бўлган самимий истагини” қадрлашини билдирди. Украина президенти Владимир Зеленский Пекин таклифларини тинчлик режаси сифатида кўрмади. “Менимча, Хитой бу борада ўз фикрларини билдирганга ўхшайди”, — деган Украина раҳбари. “Хитой можаро ҳақида гапира бошлагани яхши, бошқа савол эса — бу сўзлар ортида нима бор?”
АҚШ президенти Жо Байден Хитойнинг тинчлик режасини фақат Россия учун фойдали деб атади. Германия канцлери Олаф Шольц эса таклифларда Россия қўшинларини Украинадан олиб чиқиш банди йўқлигига эътибор қаратган.
Айни вазиятда Россиянинг Украинадаги тажрибасини ҳисобга олган ҳолда, Хитой етакчиси Тайванга бостириб кириш режасини амалга ошириш мумкинлигига шубҳа қилмоқда. Бу ҳақда АҚШ Марказий разведка бошқармаси (МРБ) директори Уилям Бернс CBS телеканалидаги интервьюсида айтди.
“Россия президенти Владимир Путиннинг Украинадаги тажрибасини Си Цзиньпинчалик диққат билан кузатаётган хорижий етакчи йўқ”, — деди Бернс.
Унинг сўзларига кўра, Хитой раҳбарининг Тайван устидан якуний назоратни қўлга киритиш ҳақидаги амбициялари жуда жиддий қабул қилиниши керак, аммо “бу ҳарбий можаро ҳозирча муқаррар дегани эмас”.
Ўзбекистонлик халқаро юк ташувчилар Транспорт вазирлиги томонидан огоҳлантирилди
Ўзбекистон Транспорт вазирлиги Беларусь орқали Польшага автотранспортда халқаро юк ташиш фаолияти билан шуғулланувчиларни огоҳлантирди.
Қайд этилишича, Польша Ички ишлар вазирлигининг тегишли қарори билан 21 февралдан Беларусь билан “Кукурики—Козловичи” чегараси орқали барча юк автотранспорт воситаларининг икки томонлама ҳаракатланиши номаълум муддатга тўхтатилган.
Ҳозирга келиб ушбу чегарада хорижий мамлакатлар юк ташувчи транспортлари тўпланиб қолган.Вазиятни кузатадиган бўлсак , аввалроқ Польша Беларусь билан чегарадаги энг йирик назорат-ўтказиш пунктларидан бири Бобровникини ҳам ёпган эди.
Польша ички ишлар вазири Каминскийнинг таъкидлашича, бундай қарор “давлат хавфсизлиги манфаатларидан келиб чиққан ҳолда” қабул қилинган. Эслатиб ўтамиз, булардан ташқари ҳозиргача, Беларусь ва Польша ўртасидаги яна 3 та чегара ёпилган
Ўзбекистон транспорт вазирлиги “Шу муносабат билан миллий ташувчилардан Европа мамлакатларига юк ташувларини амалга оширишда ушбу ҳолатни инобатга олишларини сўради.
Таъкидланишича, ҳозирда ўзбек миллий ташувчилари юк транспортларини Литва чегараси орқали тўсиқларсиз ҳаракатланишини таъминлаш учун музокаралар олиб борилмоқда.
Европа давлатларига ҳаракатланаётган миллий ташувчиларда ушбу вазият юзасидан саволлар туғилса қуйидаги телефон рақамларига қўнғироқ қилишлари мумкин: +998 (71) 202-05-01 (114) +998 (97) 709-16-00.
Изоҳ (0)