Украинадаги урушни тугатиш бўйича ўз режасини таклиф қилган Хитой агрессорни жабрланувчидан фарқламаяпти, деди Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел.
“Бу чинакам тинчлик режаси эмас ва у асосан Хитойнинг ҳаммага маълум позицияларини такрорлайди. Албатта, биз буни ўрганиб чиқмоқдамиз, лекин асосий муаммо шундаки, бу режа агрессор ва жабрланувчини фарқламайди, уларни тенглаштиради”, — деди Боррел.
Украинада уруш бошланганининг бир йиллиги муносабати билан Пекин 12 банддан иборат “тинчлик режаси”ни эълон қилганди. Унда Хитой томони, хусусан, барча давлатларнинг суверенитети ва ҳудудий яхлитлигини ҳурмат қилишни, совуқ уруш менталитетидан воз кечишни, ҳарбий ҳаракатларни тўхтатишни, музокараларни қайта бошлашни ва бир томонлама санкцияларни бекор қилишни таклиф қилган.
Россия Ташқи ишлар вазирлиги “хитойлик дўстларининг Украинадаги можарони тинч йўл билан ҳал қилишга ҳисса қўшишга бўлган самимий истагини” қадрлашини билдирди. Украина президенти Владимир Зеленский Пекин таклифларини тинчлик режаси сифатида кўрмади. “Менимча, Хитой бу борада ўз фикрларини билдирганга ўхшайди”, — деди Украина раҳбари. “Хитой можаро ҳақида гапира бошлагани яхши, бошқа савол эса — бу сўзлар ортида нима бор?”
АҚШ президенти Жо Байден Хитойнинг тинчлик режасини фақат Россия учун фойдали деб атади. Германия канцлери Олаф Шольц таклифларда Россия қўшинларини Украинадан олиб чиқиш банди йўқлигига эътибор қаратди.
Изоҳ (0)