Россия ҳарбий-техник нуқтайи назардан ядро урушига тайёр. Бу ҳақда Россия президенти Владимир Путин телебошловчи Дмитрий Кисилёвга берган интервьюсида маълум қилди, дея хабар берди “РБК”.
Путин воқеаларнинг ноаниқ тарзда ривожланаётгани ёки ҳар доим ҳам тўғри йўлда давом этмаслигини айтди.
“Ҳарбий-техник нуқтайи назардан, биз, албатта, тайёрмиз. Бизда улар (ядровий ракеталар) доимо жанговар шай ҳолатда туради”, — деди Путин Россия ҳақиқатан ҳам ядро урушига тайёрми, деган саволга жавоб берар экан.
Тактик ядро қуроллари ҳақида гапирар экан, Путин Украинадаги “махсус операция” вақтида бундай қуроллардан фойдаланишга ҳеч қачон эҳтиёж бўлмаганини таъкидлади. Бу унинг хаёлига ҳеч қачон бундай фикр келмаганини англатадими, деган саволга Путин: “Йўқ, лекин нима учун?” тарзида жавоб берди.
“Бизнинг ўз принципларимиз бор. Россия давлатининг мавжудлиги, суверенитетимиз ва мустақиллигимизга зарар етган тақдирда, ҳар қандай қуролни, шу жумладан, сиз айтган қуролларни ҳам (ядровий қурол) ишлатишга тайёрмиз. Биз учун Стратегияда ҳамма нарса ёзилган, уни ўзгартирмадик”, — дея қўшимча қилди Путин.
АҚШнинг ядровий салоҳияти ҳақида
Шунингдек, у бугунги кунда АҚШ ҳам ядровий кучларини ривожлантираётганини, бироқ бу уларнинг уруш бошлашга тайёрлигини англатмаслигини эслатди. Агар АҚШ ядровий синовлар ўтказса, Россия ҳам шундай қилиши мумкин.
“Янги жанговар каллаклар пайдо бўлганда, баъзи экспертларнинг фикрича, уларни фақат компьютерда синаб кўришнинг ўзи кифоя эмас, табиий кўринишида синаб кўриш зарур. Шундай ғоялар АҚШдаги маълум доиралар атрофида айланиб юрибди. Биз бу ҳақда биламиз, кузатяпмиз”, — деди у.
Ғарб қўшинларининг Украинада бўлиши эҳтимоли
Шунингдек, Путин Украинада Ғарб қўшинларининг мавжудлиги мавзусига ҳам тўхталиб, агар АҚШ ўз кучларини у ерга юборишга қарор қилса, Россия бундай қадамни, шунингдек, Россия ҳудудига Америка қўшинларининг киришини аралашув сифатида баҳолайди.
“(АҚШ президенти Жо Байден) шахс, анъанавий сиёсий мактаб вакили эканини айтдим ва бу тасдиқланди. У ерда Байдендан ташқари Россия—Америка муносабатлари ва стратегик чеклов соҳасида кўплаб бошқа мутахассислар бор. Менимча, ҳамма нарса бунчалик шошаётгани йўқ, лекин бунга тайёрмиз”, — деди Путин.
Россия Финляндия чегарасида қўшин жойлаштирмоқчи
Путин Финляндия НАТОга аъзо бўлганидан кейин унинг чегаралари яқинида Россия қўшинлари ва йўқ қилиш тизимлари пайдо бўлишини таъкидлади.
“Россия ва Финляндия авваллари шунчаки идеал муносабатларга эга эдилар: икки давлатнинг бир бирига қарши, хусусан, ҳудудий даъвоси йўқ эди. Бизнинг у ерда қўшинларимиз ҳам йўқ эди, барчасини Россия-Финландия чегарасидан олиб чиққан эдик. Нега бундай қилишди?..Бу ўз миллий манфаатларини таъминлаш нуқтаи назаридан мутлақо бемаъни қадам. Бироқ, бу уларнинг масаласи. Улар шундай қарорга келишди. Лекин у ерда қўшинларимиз йўқ эди, энди бўламиз”, — дея таъкидлади у.
Февраль ойида Путин америкалик журналист Такер Карлсонга интервью берганди. Ўшанда у Украинанинг пайдо бўлиш тарихи, конфликт сабаблари, НАТО билан зиддият ҳақида гапириб, суҳбат сўнгида Зеленскийга мурожаат қилган эди.
Изоҳ (0)