АҚШ ва Украина Россия Путин томонидан эълон қилинган «Рождество сулҳи»ни бузганини маълум қилди

АҚШ мудофаа вазирининг Россия, Украина ва Евросиё масалалари бўйича ёрдамчиси ўринбосари Лора Купер айтишича, Россия ҳукумати томонидан эълон қилинган вақтинчалик ўт очишни тўхтатиш режимига қарамасдан, Украинада жанговар ҳаракатлар давом этган.

«Россия президенти Владимир Путиннинг ўт очишни тўхтатиш ҳақидаги баёнотига келсак, айтишим мумкинки, бугунги кунда Украинада жанглар давом этмоқда, биз расман ўт очишни тўхтатиш режимида турган бўлсак ҳам», — деди Пентагон вакили.

Лора Купер Путиннинг вақтинчалик ўт очишни тўхтатиш режими ҳақидаги баёнотига бироз шубҳа билан қарашни сўради. «Худди шу одамнинг ўзи Украинага бостириб кирмаслигини айтганди», — деди у.

«Рождество сулҳи» ҳақида эълон қилинганига қарамай, Россия қўшинлари Украинада жанговар ҳаракатларни давом эттиргани ҳақида Луганск вилояти маъмурияти раҳбари Сергей Гайдай ҳам маълум қилди.

Украина қуролли кучлари Бош штаби томонидан 7 январь куни эрталаб эълон қилинган маълумотда айтилишича, 6 январь куни Россия қўшинлари бир марта ракета зарбаси бериб, бараварига ўт очиш реактив тизимида 20 марта ўқ узган.

Аввалроқ Путиннинг Рождество муносабати билан ўт очишни тўхтатиш режими ҳақидаги ғояси унга нисбатан норозиликни кучайтиргани ва танқидларга сабаб бўлгани хабар берилганди.

Рождество сулҳи

Россия президенти Владимир Путин 6 январь соат 12:00 дан 7 январь куни соат 24:00 га қадар Украинадаги барча тўқнашув чизиғи бўйлаб ўт очишни тўхтатишни буюрган. Мазкур қарор православларнинг черковга бориши учун қабул қилинган. Москва Киевни ҳам ўт очишни тўхтатишга чақирган.

Украина президенти Владимир Зеленский Россия Рождество байрамини ниқоб қилиб, рус ҳарбийларига жиҳозлар, ўқ-дорилар етказиб бериш, сафарбарларни позицияларга яқинлаштиришни кўзлаганини айтди. Президент офиси раҳбари маслаҳатчиси Михаил Подоляк Россия таклифини иккиюзламачилик деб атади. У сулҳга рози бўлиш учун Россия бажариши керак бўлган иккита шартни айтди.

Украина Миллий хавфсизлик ва мудофаа кенгаши котиби Алексей Данилов ҳам сулҳ бўйича ўз фикрини билдирди. У Россия билан «Рождество сулҳи» бўйича ҳеч қандай музокара олиб борилмаслиги, «тажовузкор давлат» Украина ҳудудини тарк этиши кераклигини айтди.