АҚШ президенти лавозимига қайта сайланишга интилаётган Дональд Трамп Республикачилар партиясидан давлат раҳбари лавозимига кўрсатилган номзодни қабул қилди ва шу тариқа расмий номзодга айланди.
18 июль куни Висконсин штатида бўлиб ўтган Республикачилар партиясининг Миллий қурултойида нутқ сўзлаган Трамп Американинг ярмини эмас, балки бутун Америка президенти бўлишни хоҳлашини айтган.
Трамп “мамлакатни вайрон қилаётган” АҚШнинг амалдаги президенти Жо Байденни кескин танқид қилиб, халқни яқинлашиб келаётган ҳалокатдан фақат унинг ўзи қутқаришга қодир эканини таъкидлаган. Трамп унга қарши қўзғатилган жиноий ишларни демократик фитнанинг бир қисми деб атаган.
Россия-Украина уруши, Ғазодаги уруш ва Америка қўшинларининг Афғонистондан тартибсиз олиб чиқилиши каби мавзулар Трамп нутқида муҳим ўрин эгаллаган. Собиқ президент дунёнинг хаос ҳолатидаги расмини чизиб, буларнинг барчасида Жо Байденни айбдор деб атаган. Унинг сўзларига кўра, айнан Байден АҚШнинг жаҳон саҳнасидаги позициясини заифлаштирган.
“Агар ҳокимиятда бўлганимда, дунёдаги мавжуд барча йирик инқирозлар юз бермаган бўларди. Мен бу маъмурият яратган ҳар бир халқаро инқирозни, жумладан, Россиянинг Украина билан олиб борган даҳшатли урушини тўхтатаман”, дея таъкидлаган ва уларни бартараф этишга ваъда берган.
Трамп Украинадаги урушни қандай тўхтатиши ҳақида батафсил маълумот бермаган ва фақат “бир телефон қўнғироғи билан урушларни тўхтатиши” мумкинлигини айтган.
Ғазо секторидаги уруш ҳақида гапирар экан, собиқ президент Исроилга ёрдамни кенгайтиришга ваъда бермаган.
Изоҳ (0)