Муваффақиятли шоумендан тортиб дунёдаги энг машҳур сиёсатчигача — Украина президенти Владимир Зеленский 25 январь куни 45 ёшга тўлди. Украиналик журналистлар президент уруш даврида қандай ўзгаргани ҳақида маълумот берди.
Маълум қилинишича, Зеленскийнинг ҳам барча сиёсатчилар каби тарафдорлари ва мухолифлари бор, лекин кўпчилик Украинадаги уруш сабабли у кескин ўзгарганини таъкидлайди. Россия билан қарама-қаршилик пайтида президент қандай ўзгаришларни бошдан кечирди?
Зеленский ҳар куни украиналикларга мурожаат қилиб, ҳисобот беради. Уларга уруш даврида мотивация бериб, миннатдорлик билдиради. У бир неча йил олдин муваффақиятли актёр, сценарист, режиссёр ва продюсер сифатида танилган бўлса, ҳозирда энг машҳур сиёсатчи ва нуфузли шахс ҳисобланади.
“Украинадаги уруш Владимир Зеленскийни тубдан ўзгартирди. Сизнинг эътиборингизни тортадиган биринчи нарса — юз қиёфаси. Буни 2021—2022 йил охирида Украина раҳбарининг Янги йил табриги видеоларида аниқ сезиш мумкин”, — дейди журналистлар.
“Икки хил қиёфа. Асосий фарқ соқол ўсгани ёки ҳарбий кийимда эмас. Шунчаки бошқача юз ифодаси”, — дейди психотерапевт Олег Чабан. У уруш Зеленскийни кучлироқ қилганига ишонч билдириб, бу травмадан кейинги ўсиш эканини таъкидлайди.
Зеленский характеридаги ўзгаришларни ҳарбий эксперт Олег Жданов ҳам пайқаган. У буни АҚШ раҳбари Жо Байден Зеленскийга Украинадан эвакуация қилиш таклифини рад этганида унга янгича муносабатда бўлгани билан изоҳлаган. Владимир Зеленскийни узоқ вақтдан бери таниганлар уруш Украина президентининг юзига чарчоқ ифодасини қўшган бўлса-да, мавжуд характерини очиқ кўрсатаётганини илгари сурган.
Зеленскийнинг туғилган куни
25 январь куни Украина президенти Владимир Зеленский 45 ёшга тўлди. Украина биринчи хоними таъсирли пост орқали уни туғилган куни билан табриклади.
“Одамлар мендан тез-тез йил давомида қандай ўзгарганингни сўрашади. Мен эса доим “ўзгариш йўқ”, деб жавоб бераман. Ўн етти ёшимизда қандай танишган бўлсак, ўшандай йигитсан. Аммо, аслида, ўзгаришга учраган нарса мавжуд: ҳозир анча кам табассум қиласан. Кўпроқ табассумингга сабаб топилишини тилайман. Аслида, бу сабаб нимадалигини ҳамма билади”, — деб ёзди Елена Зеленская ва турмуш ўртоғига соғлик тилади.
Изоҳ (0)