АҚШ Мудофаа вазирлиги Яқин Шарқдаги ягона USS Абраҳам Линкольн авиаташувчисини олиб чиқди. Бироқ Қўшма Штатлар турли таҳдидлар ва кутилмаган вазиятларга қарши курашиш учун етарли салоҳиятга эгалигини билдирди. Бу ҳақда Al Arabiya хабар берди.
USS Абраҳам Линкольн АҚШ Марказий қўмондонлиги маъсул зонани тарк этиб, Ҳинд-Тинч океанидаги 7-флот таркибига кирди. У август ойи бошида мудофаа вазири Ллойд Остин топшириғи билан USS Теодор Рузвельт авиаташувчиси ўрнини эгаллаганди.
Эрон ва Исроил муносабатлари кескинлашгани боис АҚШ минтақага қўшимча ракетага қарши мудофаа тизимлари, қирувчи ва танкер самолётлари жойлаштирди. Қатардаги Ал Удейд базасига олтита B-52 Stratofortres стратегик бомбардимончилари олиб келинди.
USS Абраҳам Линкольн авиаташувчисининг Яқин Шарқни тарк этиши АҚШнинг минтақадаги ҳарбий фаоллигини кескин камайтиради. Бироқ Пентагон таҳдидларга қарши туриш, хусусан, Яман ҳусийларининг дрон ва ракеталарини тутиб олиш учун етарли салоҳияти борлигини айтмоқда. Расмийлар, шунингдек, ҳусийларнинг қурол-яроқ омборлари ва бошқа нишонларига зарба бериш имконига эга эканини билдирди.
Биз марказий қўмондонлик ҳудудида F-16, F-15 ва бир нечта B-52 бомбардимончиларини ўз ичига олган муҳим зарбдор кучни сақлаб турамиз. Демак, у ерда муҳим позициямиз бор, деди Пентагон матбуот котиби ўринбосари Сабрина Сингх журналистларга.
Изоҳ (0)