АҚШ БМТ Хавфсизлик кенгашида Ғазода ўт очишни тўхтатишга чақирувчи резолюцияга овоз беришда қўллаган вето халқаро ҳамжамиятнинг анклавда сулҳ ўрнатишга қаратилган саъй-ҳаракатларини амалда бекор қилади. Бу ҳақда ҲАМАС ҳаракати баёнот берди.
“ҲАМАС АҚШнинг Хавфсизлик кенгашида Ғазода зудлик билан ўт очишни тўхтатишга чақирувчи резолюцияга қарши вето ҳуқуқидан фойдаланганини қоралайди”, дейилади ҲАМАС баёнотида.
Унда таъкидланишича, “АҚШнинг бундай душманлик позицияси халқаро ҳамжамият иродасини инкор этади ва Фаластин анклавида уруш давом этишини таъминлайди.
ҲАМАСнинг фикрича, Америка расмийларининг вето ҳуқуқидан фойдаланиш қарори “АҚШ Фаластин халқига қарши Исроил тажовузкорлигининг бевосита ҳамкори эканини ва минтақада давом этаётган уруш учун ҳам бевосита жавобгарлигини яна бир бор исботлайди”. Ҳаракат вакиллари Вашингтонни агар Қўшма Штатлар ҳақиқатан ҳам Америка маъмурияти айтганидек, урушни тўхтатиб, минтақада барқарорлик ва хавфсизликка эришмоқчи бўлса, “бундай душманлик сиёсатини тўхтатишга” чақирди.
Аввалроқ Қўшма Штатлар БМТ Хавфсизлик кенгашидаги вето ҳуқуқидан фойдаланиб, Хавфсизлик кенгашининг доимий бўлмаган ўнта аъзоси томонидан тайёрланган, зудлик билан ва шартсиз ўт очишни тўхтатишни талаб қилувчи Фаластин-Исроил можароси бўйича резолюция лойиҳасини блоклаган эди.
Резолюция лойиҳаси Жазоир, Эквадор, Гайана, Япония, Малта, Мозамбик, Жанубий Корея, Словения, Сьерра Леоне ва Швейцария томонидан тайёрланган.
Матннинг биринчи банди зудлик билан ўт очишни тўхтатишни ва ҳар икки томоннинг гаровга олинганларни (яъни, фаластинлик маҳбусларни ҳам) озод қилишни талаб қилади. Шу билан бирга, резолюциянинг биринчи банди матни Ғазодаги гаровга олинганлар ўт очишни тўхтатиш билан бир вақтда озод этилишини англатмайди.
Ҳужжат учун Хавфсизлик кенгашининг 15 аъзосидан 14 нафари овоз берган. 2023 йил октябрь ойида Яқин Шарқдаги можаро авж олганидан бери АҚШ Ғазода ўт очишни тўхтатишга чақирувчи резолюцияни бешинчи марта блокламоқда.
Изоҳ (0)