Украина президенти Владимир Зеленский Россия ҳарбий саноатига нисбатан янги санкциялар пакетини эълон қилди. “Экономическая Правда” нашрининг ёзишича, санкциялар рўйхатидан 493 та юридик ва 208 нафар жисмоний шахс ўрин олган.
“Террорчи-давлат ва Россия билан боғлиқ юзлаб жисмоний ҳамда юридик шахслар глобал изоляция нишонига айланмоқда. Шерикларимиз билан ушбу тажовузга хизмат қилаётган барча, террорчилар қўлига қурол, ўқ-дори техника ва технологияларни бераётганларнинг дунё томонидан эзиб ташланиши учун фаол ишлаяпмиз”, — дейди Зеленский.
Санкция жорий этилган компанияларнинг аксарияти Россия ва Беларусга тегишли. Улар орасида Беларусь машинасозлик корхонаси, Россия енгил саноат корхонаси, жумладан, тўқимачилик ва пойабзал фабрикалари, электроника ишлаб чиқарувчи завод ҳамда компаниялар бор.
Шунингдек, Украина президенти “Запорожстал” улуши мусодара қилинганини маълум қилди. Таъкидланишича, унга офшор компаниялар орқали Россия банки эгалик қилиб келган. Зеленский кредит ташкилоти номини ошкор этмаган, аммо “Коммерсант” нашри 2010 йилда Россиянинг йирик давлат тараққиёт корпорацияси (ВЕБ) “Запорожстал” харидини молиялаштирганини ёзганди.
Украинада уруш бошланганининг бир йиллиги муносабати билан АҚШ ва Европа Иттифоқи Россияга қарши янги санкциялар киритди. Россиянинг 11 банки Вашингтоннинг янги чекловлари остида қолди. Бундан ташқари, АҚШ Россиядан алюминий ва алюминий маҳсулотларига 200 фоиз бож жорий этмоқда. Россиянинг 50 дан ортиқ амалдорлари, хусусан, баъзи вазир ва губернаторлар янги санкцияларга дучор бўлди. Март бошларида АҚШ президенти Жо Байден ва Германия канцлери Олаф Шольц Вашингтонда музокара ўтказди ва унинг давомида Россияни Украинадаги воқеалар учун етарлича жавобгарликка тортиш ниятини билдирганди.
Изоҳ (0)